Shifokorlar endigina 2 yoshni qarshilayotgan farg‘onalik Samira Toirjonovaning qornidan jami 135 ta magnit sharchani chiqarib olishdi. Bu haqida Sog‘liqni saqlash vazirligi xabar berdi.
Ma’lum bo‘lishicha, qizaloq magnit sharchalarni o‘ynab yurgan va shu jarayonda ulardan ancha-munchasini yutib yuborgan. Vaqt o‘tishi bilan sharchalar qornida yig‘ilib qolgan va uning hayotiga jiddiy xavf solgan.
Ota-onasi zudlik bilan Respublika shoshilinch tibbiy yordam ilmiy markazi Farg‘ona viloyati filialiga murojaat qiladi. Tekshiruvlar o‘tkazilganida qorinning ikki yonida magnitlar yig‘ilib qolgani aniqlangan.
Shifokorlar konservativ usulda davolashga kirishib, qayd qildirish orqali sharchalardan 14 donasini chiqarib oladi, ammo aksariyati ichkarida qolayotgandi.
Vaziyat tezkor choralar ko‘rishni taqozo etardi. Shu bois ota-ona bolani Toshkent Respublika shoshilinch tibbiy yordam ilmiy markaziga olib keladi. Bu yerda go‘dak yana bir bor tekshiruvdan o‘tkazilgach, jarrohlik amaliyoti o‘tkaziladi.
Shifokorlar sa’y-harakati bilan qizaloq qornidagi 135 ta magnit sharcha olinadi.
To‘rt yarim soat davom etgan ushbu murakkab operatsiyani tibbiyot fanlari doktori, professor Habibulla Oqilov hamda markazning Nozim O‘rmonov, Dilmurod Sabirov kabi tajribali mutaxassislari amalga oshirdi.
Ayni chog‘da qizcha o‘zini yaxshi his etayotgani xabar qilindi.
Yanvar oyining boshida qozog‘istonlik jarrohlar 4 yoshli bolaning ichaklaridan 39 ta magnit sharni olib tashlagani xabar qilingandi. Bolalar jarrohi Salimjon Jakupovning aytishicha, operatsiya deyarli besh soat davom etgan.
Izoh (0)