Buxoroda 11 dona mix va to‘g‘nog‘ich yutib yuborgan yigitga yordam ko‘rsatildi. Bu haqda Respublika shoshilinch tibbiy yordam ilmiy markazi Buxoro filiali xabar qildi.
Markaz filialiga 2005-yilda tug‘ilgan bemor ko‘ngil aynishi, oshqozon sohasida og‘riq va ovqat o‘tishining qiyinlashishi shikoyatlari bilan murojaat qilgan. U ikki kun oldin ko‘p miqdorda to‘g‘nog‘ich va mix yutganini bildirgan. Bemor psixiatr nazoratida ro‘yxatda turgan.
Rentgen tekshiruvida oshqozon va 12 barmoqli ichakda ko‘p sonli metalsimon yot jismlar, FGDS (fibrogastroduodenoskopiya) tekshiruvida esa oshqozonning pilorik qismida va katta egriligida 2×5 sm o‘lchamli to‘g‘nog‘ich hamda mixlar borligi aniqlangan.
Bemorda zudlik bilan endoskopik jarrohlik amalga oshirilib, bosqichma-bosqich 5 dona to‘g‘nog‘ich va 6 dona mix oshqozon va 12 barmoqli ichak bo‘shlig‘idan olib tashlangan.
Xabarda aytilishicha, so‘nggi yillarda aholi o‘rtasida oshqozon, ichak organlariga yot jismlarning tushishi sodir bo‘lgan holatlar bilan tibbiyot muassasalariga murojaatlar soni statistik ma’lumotlarga ko‘ra nisbatan ko‘payishi qayd qilinmoqda. Yot jismlarning oshqozon, ichak va boshqa organlarga tushishi holatlari 1 yoshdan 25 yoshgacha bo‘lgan erkak va ayollarda ko‘p uchraydi.
2025-yilning yanvarida farg‘onalik 2 yoshli qizaloqning qornidan 135 ta magnit sharcha chiqarib olingandi. O‘sha oyda qozog‘istonlik jarrohlar 4 yoshli bolaning ichaklaridan 39 ta magnit sharni olib tashlagandi. 20-fevral kuni Qozog‘istonning Olmaota shahrida jarrohlar ikki yoshli bolaning oshqozonidan 105 dona magnitli munchoqni chiqarib olgani xabar qilingandi.
Izoh (0)