Qozog‘istonning Olmaota shahrida jarrohlar ikki yoshli bolaning oshqozonidan 105 dona magnitli munchoqni chiqarib oldi. Bu haqda Tengrinews xabar berdi.
20-fevral kuni Bolalar shoshilinch tibbiy yordam markaziga 2 yosh-u 3 oylik bola yot jismni yutib yuborgani bo‘yicha shikoyat qilingan. Ota-onasining so‘zlariga ko‘ra, taxminan bir hafta oldin mehmonga borganida, bola metall magnitlarni yutib yuborgan bo‘lishi mumkin. Ammo ularning aniq soni noma’lumligi ta’kidlangan.
Qorin bo‘shlig‘i a’zolari rentgenografiyasida o‘lchami 6,2×2,2 santimetr bo‘lgan ko‘plab metall buyumlardan iborat konglomerat aniqlandi. Bola yot jismni olib tashlash uchun shoshilinch ravishda kasalxonaga yotqizildi.
Dastlab mutaxassislar buyumlarni endoskopik yo‘l bilan ajratib olishga harakat qildi, biroq magnitlarning zich to‘planishi tufayli buning iloji bo‘lmadi. Jarrohlik amaliyoti — laparotomiya va gastrotomiya o‘tkazishga qaror qilindi. Jarrohlik amaliyoti davomida bolaning oshqozonidan 105 dona magnitli munchoq chiqarib olindi, deyiladi xabarda.
Jarrohlik amaliyotidan so‘ng bemor reanimatsiya bo‘limiga, keyin esa jarrohlik bo‘limiga o‘tkazilgan. Hozirda bolaning ahvoli qoniqarli.
Bu Qozog‘istonda bola noma’lum jismni yutib yuborgan birinchi holat emas
- Yanvar oyida qozog‘istonlik jarrohlar 4 yoshli bolaning ichaklaridan 39 ta magnit sharni olib tashlagandi. O‘shdan operatsiya deyarli bir soat davom etgan.
- 2024-yil esa Qozog‘istonda 10 ta magnit yutib yuborgan bola vafot etgan. Hodisa iyul oyi boshida Rudniy shahrida kuzatilgan. Uni bolalar shifoxonasiga olib borishgan, biroq bola bir necha kun o‘tib vafot etgan.
- 2023-yilda Qozog‘istonda 3 yashar bola to‘rtta igna va “zamok” bosh qismini yutib yuborgan. Shifokorlar bolaning ko‘krak qafasi va qorin bo‘shlig‘ini rentgen qilgan va uning oshqozonida “zamok”ning bir qismini va uchta tikuv ignasini aniqlagan. Bola kasalxonaning jarrohlik bo‘limiga o‘tkazilgan, u yerda ignalar olib tashlangan.
- Shu yilda Qozog‘istonda ikki yashar bola 11 ta magnitni yutib yuborgani aniqlangan. Bola 4-fevral kuni shoshilinch ravishda viloyat bolalar shifoxonasiga yotqizilgan. Uning qornida qattiq og‘riq qayd etilgan va qayta-qayta qayt qilgan. Qorin bo‘shlig‘i organlarining rentgenografiyasi bolada noma’lum jism mavjudligini ko‘rsatgan. Shifokorlar uni olib tashlagan.
Izoh (0)