Қирғизистоннинг Балиқчи шаҳрида мамлакатдаги илк шамол электр станциясининг қурилиши бошланди. Бу ҳақда мамлакат Қишлоқ хўжалиги вазирлигига таяниб “Вести.кг” хабар берди.
Лойиҳа ишга тушгач, йилига 250 миллион кВт/соат электр энергияси ишлаб чиқарилади. Шамол парки “Қоракўл” эркин иқтисодий зонаси ҳудудида қурилмоқда.
Бу кун ҳақиқий ўзгаришлар бошланишининг рамзи бўлди. Қирғизистон биринчи марта шамол энергетикасини ривожлантиришда сўздан амалиётга ўтмоқда, деди сув ресурслари, қишлоқ хўжалиги ва қайта ишлаш саноати вазири Бакит Торобаев.
2025 йил август ойида қуввати 1 МВт бўлган илк шамол генератори ишга туширилади. Умумий қуввати 100 МВт бўлган шамол парки икки босқичда қурилади:
- Биринчи босқич — 21 та турбина, жами 50 МВт;
- Иккинчи босқич — ҳар бири 2,5 МВт бўлган яна 20 та турбина.
Бу эса бутун минтақани барқарор электр энергияси билан таъминлаш, шунингдек, анъанавий энергия манбаларига бўлган юкламани камайтиришга хизмат қилади. Шамол парки нафақат Иссиқкўл вилоятини электр энергияси билан таъминлайди, балки CASА-1000 лойиҳаси доирасида уни экспорт ҳам қилади.
Шамол паркининг ишга туширилиши туфайли ҳар йили 35 мингта автомобилдан чиқадиган чиқиндига тенг ифлосланишнинг олди олинади. Бу карбонат ангидрид, смог, кислотали ёмғирлар ва нафас олиш йўллари касалликларининг камайишига олиб келади, дейилади хабарда.
Қурилиш ва эксплуатация босқичида 50 тагача иш ўрни яратилади. Маҳаллий бюджетга солиқ тушумлари ва ижтимоий инфратузилмага инвестициялар киритилиши ҳам кўзда тутилган.
Изоҳ (0)