Тошкентдан Иссиқкўлга мавсумий автобус қатновлари бошланади, деб хабар бермоқда Транспорт вазирлиги.
Унга кўра, жорий йилнинг 11 июнь санасидан бошлаб Тошкент–Чўлпон-ота (Иссиқкўл) йўналишида мавсумий автобус қатнови бошланади. Қатновлар ҳар куни Yutong автобусларида амалга оширилади. Автобус соат 15:00 да Тошкент автовокзалидан жўнайди.
Чипта нархи 300 000 сўм этиб белгиланган.
Тошкентдан Иссиқкўлга 2025 йилнинг ёзидан поезд қатнови йўлга қўйилиши айтилган эди.
Иссиқкўлдаги тўртта пансионат Ўзбекистонга берилгани маълум қилинганди. Шавкат Мирзиёев Қирғизистон ҳукумати билан Иссиқкўлдаги курорт ва дам олиш масканлари тўғрисидаги келишувни тасдиқлаганди. Битим Садир Жапаровнинг июль ойидаги Ўзбекистонга ташрифи доирасида имзоланган. Қирғизистон Вазирлар Маҳкамаси ушбу келишувни 23 сентябрда тасдиқлаган.
Иссиқкўл — Қирғизистоннинг “марвариди"
Иссиқкўл (қирғиз тилида “Иссйк-Кул” — “илиқ кўл”) — Қирғизистоннинг шимоли-шарқида, Тян-Шан тоғ тизмасида жойлашган йирик тоғ кўли бўлиб, дунёдаги энг чуқур ва энг катта шўр сувли кўллардан биридир. Кўлнинг узунлиги 178 км, эни 60 км, чуқурлиги эса 668 метрга етади. У денгиз сатҳидан 1 607 метр баландликда жойлашган бўлиб, юқори шўрлиги туфайли қишда музламайди.
Туризм статистикаси
Иссиқкўл Қирғизистоннинг энг машҳур туристик йўналишларидан бири ҳисобланади. 2024 йил ёзги мавсумида бу ҳудудга 724 722 нафар сайёҳ ташриф буюрган бўлиб, бу ўтган йилга нисбатан 29 минг кишига кўпдир.
Умуман олганда, Қирғизистонга ташриф буюраётган хорижий сайёҳларнинг асосий қисмини Ўзбекистон фуқаролари ташкил этади. 2024 йилда мамлакатга келган 8,6 миллион сайёҳнинг 61,7 фоизи Ўзбекистондан бўлган.
Ўзбекистон билан алоқалар
Ўзбекистон ва Қирғизистон ўртасида туризм соҳасидаги ҳамкорлик йилдан йилга мустаҳкамланмоқда. 2023 йил 4 июль куни Ўзбекистон делегацияси Иссиқкўл вилоятига ташриф буюриб, Тошкентдан Иссиқкўлга биринчи мавсумий чартер рейсининг очилишида иштирок этди.
Бундан ташқари, Иссиқкўл Ўзбекистоннинг туристик йўналишларига ҳам киритилган бўлиб, кўплаб сайёҳлик агентликлари Тошкент, Самарқанд, Бухоро каби шаҳарларни Иссиқкўл билан бирлаштирган турларни таклиф этмоқда.
Изоҳ (0)