Qirg‘izistonning Baliqchi shahrida mamlakatdagi ilk shamol elektr stansiyasining qurilishi boshlandi. Bu haqda mamlakat Qishloq xo‘jaligi vazirligiga tayanib “Vesti.kg” xabar berdi.
Loyiha ishga tushgach, yiliga 250 million kVt/soat elektr energiyasi ishlab chiqariladi. Shamol parki “Qorako‘l” erkin iqtisodiy zonasi hududida qurilmoqda.
Bu kun haqiqiy o‘zgarishlar boshlanishining ramzi bo‘ldi. Qirg‘iziston birinchi marta shamol energetikasini rivojlantirishda so‘zdan amaliyotga o‘tmoqda, dedi suv resurslari, qishloq xo‘jaligi va qayta ishlash sanoati vaziri Bakit Torobayev.
2025-yil avgust oyida quvvati 1 MVt bo‘lgan ilk shamol generatori ishga tushiriladi. Umumiy quvvati 100 MVt bo‘lgan shamol parki ikki bosqichda quriladi:
- Birinchi bosqich — 21 ta turbina, jami 50 MVt;
- Ikkinchi bosqich — har biri 2,5 MVt bo‘lgan yana 20 ta turbina.
Bu esa butun mintaqani barqaror elektr energiyasi bilan ta’minlash, shuningdek, an’anaviy energiya manbalariga bo‘lgan yuklamani kamaytirishga xizmat qiladi. Shamol parki nafaqat Issiqko‘l viloyatini elektr energiyasi bilan ta’minlaydi, balki CASA-1000 loyihasi doirasida uni eksport ham qiladi.
Shamol parkining ishga tushirilishi tufayli har yili 35 mingta avtomobildan chiqadigan chiqindiga teng ifloslanishning oldi olinadi. Bu karbonat angidrid, smog, kislotali yomg‘irlar va nafas olish yo‘llari kasalliklarining kamayishiga olib keladi, deyiladi xabarda.
Qurilish va ekspluatatsiya bosqichida 50 tagacha ish o‘rni yaratiladi. Mahalliy byudjetga soliq tushumlari va ijtimoiy infratuzilmaga investitsiyalar kiritilishi ham ko‘zda tutilgan.
Izoh (0)