Германия Иордания билан ҳамкорликда Ғазо сектори аҳолисига инсонпарварлик ёрдами кўрсатиш мақсадида “ҳаво кўприги” ташкил этмоқда. Бу ҳақда Германия Федерал канцлери Фридрих Мерц асосий вазирликлар ва хавфсизлик идоралари раҳбарлари иштирокидаги норасмий орган — Хавфсизлик кенгаши йиғилишидан сўнг журналистларга маълум қилди.
“Германия ҳукумати Иордания билан ҳамкорликда Ғазо устидан инсонпарварлик ёрдамини етказиб бериш учун дарҳол “ҳаво кўприги” ташкил этмоқда. Мудофаа вазири Борис Писториус озиқ-овқат ва дори-дармонлар учун бундай “ҳаво кўприги”ни таъминлашга тайёр бўлган Франция ва Буюк Британия билан ҳаракатларни яқиндан мувофиқлаштиради. Ғазодаги тинч аҳолининг азоб-уқубатларига иложи борича тезроқ барҳам бермоқчимиз”, деди Мерц.
Шунингдек, канцлер йиғилишда Фаластин давлатчилигини тан олиш масаласи ҳам муҳокама қилинганини маълум қилган.
“ГФР ҳукумати ҳозирча бу борада қарор қабул қилиш ниятида эмас. Биз Фаластин давлатини тан олишни биринчи эмас, балки икки давлат ечимини амалга ошириш йўлидаги эҳтимолий сўнгги қадамлардан бири сифатида кўрмоқдамиз”, деди Мерц.
Бундан аввал 2023 йил 7 октябрдан буён Исроилнинг Ғазодаги уруши оқибатида Бирлашган Миллатлар Ташкилотининг 300 нафардан ортиқ ходими ҳалок бўлгани хабар қилинганди.
Буюк Британия бош вазири Кир Стармер зудлик билан Ғазо секторига гуманитар ёрдам юборилишини маълум қилганди.
Исроил мудофаа кучлари 27 июль куни эрта тонгда Ғазога ёрдам киритиш бошланганини эълон қилган. Жумладан, секторга ҳаводан ун, шакар ва консервалардан иборат 7 та ёрдам пакети ташлангани очиқланган. Шунингдек, яҳудий давлати 27 июль куни соат 10:00 дан 20:00 гача (Ўзбекистон вақти билан 12:00 дан 22:00 гача) Ал-Мавосий, Дайр-ал-Бало ва Ғазо шаҳарларида гуманитар ёрдам кириши учун тинчлик ўрнатилиб, ўт очиш тўхтатилишини маълум қилган.
Буюк Британия Ғазога аввал ҳам гуманитар ёрдам тарқатиш саъй-ҳаракатларида иштирок этган. Мамлакат 2024 йили Иордания билан биргаликда Ғазо шимолига дори-дармон, озиқ-овқат ва ёқилғи каби тонналаб юкларни парашют орқали ташлаганди.
Изоҳ (0)