2021 йил якунига қадар 15 минг километр паст кучланишли электр тармоқлари ҳамда 4 минг дона трансформаторни янгилаш кўзда тутилган. Натижада Ўзбекистондаги 5 минг 377 та маҳалланинг электр таъминоти яхшиланади. Бу ҳақда «Ҳудудий электр тармоқлари» АЖ раиси Улуғбек Мустафоев 15 март, душанба куни журналистларга берган интервьюсида таъкидлаб ўтди, дея хабар бермоқда «Дарё» мухбири.
Мустафоевнинг таъкидлашича, 2021 йилда ҳам электр энергиясининг нархи ошмаслиги кутилмоқда.
«Тизимда қилинаётган ишлар ва ўзгаришлар ўз-ўзидан бўлаётгани йўқ. Халқимиз манфаати учун катта маблағлар сарфланяпти. Мана икки йилдирки, тарифларни оширганимиз йўқ. Икки йилдан бери 295 сўм турибди.
Президентимиз бу йил ҳам тарифни оширмаслик чорасини кўриш бўйича топшириқ берди. Ҳамма нарсанинг нархи ошяпти, лекин электр нархи ошгани йўқ. Агар биз оширсак, ишлаб чиқаришнинг ҳам, бошқа нарсаларнинг ҳам таннархи ошади. Давлатимиз раҳбари халқ манфаатини ўйлаб, бизга таннархни камайтириш масаласини қўймоқда.
Беш бармоқ баробар эмас. Айни пайтда тармоғимизда 25 минг нафар одам ишлайди. Тўғри, бизнинг тизимда ҳам ўғриликлар, ножўя қилинаётган ишлар жуда кўп. Аммо аҳолининг фаровон ҳаёт кечириши учун астойдил ишлашга ҳаракат қиляпмиз», — деди Улуғбек Мустафоев.
Бундан аввал Хоразмга кучли шамол ва қор бўрони ёпирилгани сабаб вилоятдаги кўплаб хонадонлар электр энергиясисиз қолгани, Ўзбекистонда 1,35 млрд долларга яна учта электр станцияси қурилиши ҳамда Тошкентда 2021 йил охирига қадар барча ёқилғи қуйиш шохобчаларида электрокарларни қувватлантириш мумкин бўлиши ҳақида хабар берилганди.
Изоҳ (0)