АҚШ президенти Дональд Трамп Исроил томонидан блокада қилинган Ғазо секторида ҳақиқий очарчилик юз бераётганини айтди. Бу баёнот Исроил бош вазири Биньямин Нетаньяхунинг анклавда “очарчилик мавжуд эмас” деган фикрига зид келмоқда. Бу ҳақда BBC хабар берди.
Трамп Шотландияда Буюк Британия бош вазири Кир Стармер билан учрашув чоғида журналистларга берган интервьюсида шундай деган:
“Билмадим… лекин болалар жуда очга ўхшайди. Бу ҳақиқий очарчиликдан бошқа нарса эмас”.
Трампнинг бу фикрлари БМТнинг гуманитар масалалар бўйича раҳбари Том Флетчер изоҳларидан кейин янгради. У BBCъга берган интервьюсида Ғазода очарчиликнинг олдини олиш учун катта миқдорда озиқ-овқат кераклигини айтганди. Флетчер Исроилнинг секторга гуманитар ёрдамни киритиш ва ҳарбий ҳаракатларни вақтинча тўхтатиш қарорларини олқишлаган. Аммо бу ёрдам “денгизга томган томчи” экани таъкидланган.
“Бу бошланиши, аммо олдимиздаги бир неча кун ҳал қилувчи бўлади. Жуда катта миқдорда ва тезда ёрдам зарур”, деди Флетчер.
Исроил армияси 27 июль куни ҳарбий ҳаракатларда “тактик танаффус” эълон қилиб, 120 та юк машинасининг Ғазога киритилганини билдирган. Шундан кейин Иордания ва БАА 28 та озиқ-овқат пакетини ҳаво орқали ташлаган.
Шу билан бирга, Ғазо Соғлиқни сақлаш вазирлиги ўтган 24 соат ичида очарчилик оқибатида яна 14 киши ҳалок бўлганини маълум қилган. Уруш бошланган 2023 йил октябрдан бери очарчилик сабабли вафот этганлар сони 147 кишига етди, уларнинг 88 нафари болалардир.
Исроил томони Ғазода очарчилик борлигини инкор этмоқда ва бунда айбланувчи эмаслигини таъкидламоқда. Нетаньяху бу борадаги айбловларни “очиқчасига ёлғон” деб атаган.
“Биз уруш давомида ҳам гуманитар ёрдам киришини таъминлаб келдик. Акс ҳолда, Ғазода бирорта одам тирик қолмаган бўларди. Ёрдамга тўсқинлик қилаётган ягона куч — бу ҲАМАС”, деган Исроил бош вазири.
БМТ вакили Флетчернинг айтишича, 27 июль куни ёрдам олиб кирилган юк машиналарининг кўпчилиги Ғазода очларчиликдан азият чекаётган аҳоли томонидан талон-торож қилинган.
“Ун ортилган юк машиналарига оч қолган одамлар ташланди. Бу ҳайдовчиларимиз учун жуда хавфли”, деди у.
Флетчер, шунингдек, Исроил армияси эълон қилган “паузалар” узоққа чўзилмаслиги мумкинлигини айтиб, бу етарли эмаслигини билдирган.
“Озиқ-овқат ва ёрдам йиғилиши учун бизга ҳафталар, ойлар керак. Энг муҳим нарса — бу ўт очишни тўхтатишдир”, дея қўшимча қилган у.
Изоҳ (0)