Ҳиндистонда шифокорлар бепарволиги сабаб туғруқ пайтида чақалоқнинг қўли бутунлай узиб юборилди. Бу ҳақда The Times of India хабар берди.
Ҳодиса 30 июль куни Ҳаряна штатининг Мандикҳера шаҳридаги давлат шифохонасида юз берган. Жабрланган оила тиббий жамоадан тушунтириш сўраганида, уларга қўпол муомала қилиниб, ҳақоратли сўзлар айтилган. Шундан сўнг улар мажбуран палатадан чиқариб юборилган. Чақалоқ эса кейинчалик Налҳар шифохонасига юборилган.
Воқеани ўрганиш учун махсус комиссия иш бошлаган. У туғруқ вақтида хонада бўлган шифокорлар ва ҳамширалар ҳақида тўлиқ маълумот тўпламоқда. Комиссия чақалоқнинг қўли қандай узилиб кетгани, болага кўрсатилган даволаш ва реабилитация чоралари, ўтказилган ички ёки идоравий текширув натижалари ҳамда жабрланувчи оилага нисбатан қўпол муомала юзасидан изоҳ талаб қилмоқда.
Комиссия бу ҳодисани Ҳиндистон Конституциясининг 21-моддасида белгиланган яшаш ва соғлиқ ҳуқуқининг қўпол бузилиши, шунингдек, БМТнинг “Бола ҳуқуқлари тўғрисида”ги конвенциясининг 6- ва 19-моддаларининг бевосита бузилиши сифатида баҳоламоқда.
Изоҳ (0)