Япония ўзининг “Могами” синфидаги стелс (яширин) фрегатини сотишга доир тарихий келишувни имзолади. Унга кўра, Австралия армияси ушбу турдаги 11 дона кема билан таъминланади. Бу японларнинг Иккинчи жаҳон урушидан кейинги илк ҳарбий кема экспорти бўлади. Бу ҳақда Business Insider хабар берди.
Австралия ҳукумати 6 август куни Mitsubishi Heavy Industries томонидан ишлаб чиқарилган 5 500 тонналик 11 та “Могами” кемасини сотиб олишини эълон қилган. Битим қиймати 6,5 миллиард доллар бўлиб, 3 та кема Японияда, қолган 8 таси эса Австралия ғарбий портларидан бирида қурилади.
Австралия мудофаа вазири Ричард Марлес бу келишувни “Япония ва Австралия ўртасидаги энг йирик мудофаа саноати битими” сифатида баҳоламоқда. “Могами” фрегатлари Австралиянинг 30 йиллик хизмат муддатини ўтаб бўлган “Анзак” синфидаги кемаларнинг ўрнини босади. Янги турдаги кемалар 2034 йилда тайёр бўладиган маҳаллий Hunter синфидаги оғир фрегатлар келгунча оралиқ дастур сифатида хизмат қилади.
Таъкидланишича, ушбу экспорт Япониянинг қурол-яроғ савдосида катта ютуқ бўлади. Токио Иккинчи жаҳон урушидан кейин урушдан воз кечиш сиёсати доирасида қурол экспортига қатъий тақиқ қўйган эди. 2014 йилда собиқ бош вазир Синдзо Абэ бу чекловни қисман юмшатган. 2023 йилда эса ушбу сиёсатга ўзгартириш киритилиб, иттифоқчи давлатларга ҳарбий қуролларини сотишга рухсат берилган.
“Могами” фрегатлари 2019 йилдан бошлаб ишлаб чиқарилади. 2022 йилдан бошлаб эса Японияда бу турдаги бир нечта кемадан фойдаланиш бошланган. Улар Тйпе 17 кемага қарши ракеталар, 16 ҳужайрали вертикал учириш тизими, оғир пулемётлар, торпедо аппаратлари ва 127 миллиметрли асосий тўп билан жиҳозланган. Унинг орқа қисмида вертолёт ва дронлар учун майдонча ҳам мавжуд.
Кемадаги кўплаб функциялар, жумладан, навигация ва қурол бошқаруви автоматлаштирилган, бу эса атиги 90 кишилик экипаж билан уни бошқаришга имкон беради (худди шу ўлчамдаги бошқа кемаларда 200 киши талаб этилади).
Япония ва Австралия сўнгги йилларда, айниқса Хитой қудратининг ортиши фонида, ҳарбий ҳамкорликни кучайтириб келмоқда. Улар АҚШ ва Ҳиндистон билан бирга “Квартет” гуруҳига аъзо бўлиб, Ҳинд—Тинч океани минтақасида Пекинга қарши мувозанат яратишни мақсад қилган.
Изоҳ (0)