O‘zbekiston va Qozog‘iston to‘rtta chegara postida yangi yuk avtomobillari harakatini yo‘lga qo‘ymoqchi. Bu haqda Bojxona qo‘mitasi xabar berdi.
Unga ko‘ra, Olmaotaga safar doirasida Bojxona qo‘mitasi raisi Qozog‘iston moliya vazirligining davlat daromadlari qo‘mitasi raisi bilan ikki tomonlama uchrashuv o‘tkazdi. Ikkala davlat o‘rtasida savdo aylanmasini kengaytirish bo‘yicha tasdiqlangan dasturga ko‘ra, 2030-yilga borib O‘zbekiston—Qozog‘iston o‘rtasidagi tashqi savdo hajmini 10 mlrd AQSH dollariga yetkazish nazarda tutilgan.
Bu esa bojxona xizmatlari oldiga ham qator vazifalarni qo‘yadi. Chegara bojxona postlarida yukli avtotransport vositalari navbatlarini boshqarish, qishloq xo‘jaligi mahsulotlari uchun soddalashtirilgan tartiblarni nazarda tutuvchi “yashil yo‘lak” rejimini joriy qilish shular jumlasidan.
Bu borada iyun oyidan O‘zbekistondagi chegara-bojxona postlarida bosqichma bosqich joriy qilinayotgan “Elektron navbat” tizimi bo‘yicha to‘xtalib o‘tildi. Mazkur tizim ilk bor aynan Qozog‘iston bilan chegarada joylashgan “Navoiy” bojxona postida joriy qilinadi.
Muloqotda bojxona xizmatlari o‘rtasida axborot almashinuvini yanada kengaytirish, xususan yirik inspeksion majmualaridan olingan skaner tasvirlarini o‘zaro almashish imkoniyatlari ko‘rib chiqildi. Shuningdek, bojxona postlari orqali harakatlangan yengil avtotransport vositalariga doir ma’lumotlarni almashishning texnik shartlari muhokama qilindi.
Ikkala davlat o‘rtasidagi “Oq oltin”—“Selinny” hamda “Malik”—“Sirdaryo” chegara bojxona postlari orqali bo‘sh yuk avtotransport vositalari va yirik gabaritli bo‘lmagan yuklar harakatini yo‘lga qo‘yish masalasi ham ko‘rib chiqildi. Bu eng avvalo O‘zbekistonning “Yallama”, “Najimov” va “Sirdaryo” chegara bojxona postlari va unga tutash Qozog‘istonning chegara bojxona postlaridagi yuklama va tirbandliklarni sezilarli ravishda qisqarishiga olib keladi.
Uchrashuvda ikkala davlatda bojxona xizmati vakillarini ta’sis etish bo‘yicha kelishuv ham muhokama qilindi. Shuningdek, tomonlar o‘zaro hamkorlikning yangi rejasini ko‘rib chiqdi. Rejada o‘tkazish punktlarini qayta qurish va rekonstruksiya qilish ishlarini jadallik bilan davom ettirish nazarda tutilgan.
Jumladan, “G‘ishtko‘prik” va “Dovud ota” chegara bojxona postlaridagi qurilish jarayonlarini yakunlash bilan bir qatorda “Sirdaryo” chegara bojxona postini qayta qurish nazarda tutilgan. Shuningdek, o‘zaro savdoga doir bojxona statistikasi bo‘yicha hamkorlikni takomillashtirish, bunda turli nomuvofiqliklarning to‘liq oldini olish zarurligi qayd etildi.
Tomonlar bojxona laboratoriyalari o‘rtasida va kadrlar malakasini oshirish bo‘yicha hamkorlikni nazarda tutuvchi kelishuvlarni ko‘rib chiqdi. Uchrashuv yakunida ikkala davlat bojxona xizmatlari o‘rtasidagi o‘zaro hamkorlikka yangicha ruh beruvchi 3 ta hujjat imzolandi.
O‘zbekiston vakolatli organlari bilan kelishilgan holda jismoniy shaxslar, yengil avtomobillar, avtobuslar va yuk ko‘tarish quvvati 3,5 tonnagacha bo‘lgan avtotransport vositalari uchun “Tajen” nazorat-o‘tkazish punkti orqali harakatlanish vaqtincha to‘xtatildi. “Tajen”—“Dovut ota” o‘tkazish punktlari orqali yengil avtotransport, avtobuslar va 3,5 tonnagacha bo‘lgan yuk transportining kesishishi va o‘tishi 2025-yil 1-fevraldan postni rekonstruksiya qilish davrida vaqtincha to‘xtatilgandi.
Izoh (0)