Ўзбекистон асални асосан АҚШ ва Афғонистонга экспорт қилмоқда. Бу ҳақда Ветеринария ва чорвачиликни ривожлантириш давлат қўмитаси хабар берди.
Қайд этилишича, 2024 йил ва 2025 йилнинг тўрт ойи давомида 206 минг доллар қийматида 64 тонна асал экспорт қилди. Асалнинг 92 фоизи АҚШ ва 7 фоизи Афғонистонга экспорт қилинган. Бу йил биринчи марта Хитойга экспорт қилиш йўлга қўйилди.
Шунингдек, 2024 йил ва 2025 йилнинг тўрт ойи давомида 5 млн АҚШ доллари миқдорида 260 минг дона асалари пакетлари экспорт қилинган. Асалари пакетлари асосан Россия, Қозоғистон ва Арманистонга экспорт қилинган бўлса, бу йил экспорт географиясига Тожикистон ҳам қўшилган.
Асалари пакетлари экспорти ўтган йилнинг мос даврига нисбатан 1,5 бараварга ошди.
Табиий асални қалбакисидан қандай ажратиш мумкин?
Сотувчилар томонидан ҳақиқий бўлмаган асалларни сотиш учун бир нечта ҳийла-найранглар қўлланади. Сифатли ва табиий асални синтетик ёки суюлтирилган асалдан фарқлаш учун уни ҳидлаб кўриш ва синчиклаб кўздан кечириш лозим, дея маслаҳат берди асаларичи Наталя Моторина.
Мутахассис сўзларига кўра, агар асалда кўпик ва пуфакчалар бўлса, бундай маҳсулотдаги органик моддаларнинг ачишидан дарак беради. Яъни асалга сув қўшиб, эритилган деганидир.
Ранги тиниқ бўлмаган, ичида доғлар ва қуйқалар мавжуд асал ҳам табиий эмас. Агар асалнинг ҳиди жуда заиф бўлса, унинг сифати пастлигини ва қўшимчалар солинганини билдиради. Асалнинг таъми ширин эмас, балки бир оз тахир бўлиши унга сироп қўшилганини англатади.
Изоҳ (0)