Ўзбекистон—Қозоғистон чегарасида жойлашган “Ғишткўприк” чегара божхона пости 2024 йилнинг мартида фойдаланишга топширилади. Бу ҳақда Тошкент вилояти божхона бошқармаси хабар берди.
Ижтимоий тармоқларда ушбу чегара божхона постида кузатилаётган тирбандликлар кенг муҳокамаларга сабаб бўлмоқда. Тошкент вилояти божхона бошқармаси бунга реконструкция ишлари сабаб бўлаётганини эслатиб ўтди.
Президентнинг 2022 йил 27 апрелдаги “Божхона маъмуриятчилигини янада такомиллаштиришга доир қўшимча чора-тадбирлар тўғрисида”ги фармонига асосан, мазкур чегара божхона постини қайта реконструкция ва модернизация қилиш назарда тутилганди.
Қайд этилишича, айни кунларда “Ғишткўприк” чегара божхона постида қурилиш ишлари давом этмоқда. “Навоий” постида ҳам замонавий божхона пости қад ростлаяпти, шу сабабли пост ёпиқ. Ассосий оқим ушбу постга йўналмоқда. Шу сабабли кўпроқ “Яллама”дан ўтиш тавсия қилинмоқда.
“ Ғишткўприк чегара божхона пости орқали бир кунда 30 мингдан 35 мингача фуқаро ва 1000 дан ошиқ транспорт воситаси ҳаракатланади. Фуқаролар ва транспорт оқими йилдан йилга кўпаймоқда, шу учун пост бутунлай замонавий қиёфа касб этади. Пост келгуси йилнинг март ойида фойдаланишга топширилади. Вақтинчалик ноқулайликлар учун узр сўраймиз”, — дейилади хабарда.
Реконструкциядан сўнг, постнинг ўтказувчанлик имконияти ошиб, бир кунда 1000 та автотранспорт воситалари ҳамда 50 минг нафаргача йўловчилар бемалол ҳаракатланиши мумкин бўлади.
Изоҳ (0)