15 май куни Тошкентда енгил атлетика бўйича UNG Meeting халқаро мусобақаси бўлиб ўтди. Sportnews.kz нашрининг хабарига кўра, мусобақанинг диск улоқтириш йўналишида иштирок этиши керак бўлган икки қозоқ спортчиси — Евгений Лабутов ва Евгений Миловацкий беллашувда қатнаша олишмади.
Қозоғистон енгил атлетика федерацияси матбуот хизматининг маълум қилишича, спортчилар белгиланган вақтда рўйхатдан ўтмагани сабабли беллашувлардан четлатилган. Яъни улар рўйхатдан ўтиш вақтига кеч қолган.
Бундай қатъий регламентга амал қилиниши мусобақанинг World Athletics (Жаҳон енгил атлетика федерацияси) кузатувчилари назорати остида ўтказилаётгани билан изоҳланмоқда.
Маълумот учун, Ўзбекистон енгил атлетика федерациясининг стадионида ўтган UNG Meeting Continental турнири Халқаро енгил атлетика федерациясининг тақвимидан ўрин олган бронза даражасидаги турнир бўлиб, унда 13 мамлакатдан ташриф буюрган спортчилар ғолиблик учун баҳс олиб боришди. Мусобақа бир кунга мўлжалланган бўлиб, унда ўзбекистонлик енгил атлетикачилар 13 та олтин, 10 та кумуш ва 4 та бронза медалига эга чиқди.
Изоҳ (0)