Ижтимоий тармоқларда Сирдарё, Яллама ва Нажимов чегара божхона постларининг Ўзбекистон билан чегарадош томонида тирбандликлар мавжудлиги юзасидан хабарлар тарқалганди. Божхона қўмитаси ҳолатга изоҳ берди.
Қайд этилишича, сўнгги йилларда мамлакат иқтисодиёти ва ташқи савдо айланмаси тобора кенгайиб, чегара-ўтказиш пунктлари орқали юк автотранспорт воситаларининг ҳаракати ҳам кескин ортиб бормоқда. Шу билан бирга, чегара божхона постларининг ўтказиш имкониятини ошириш ҳамда фуқаролар, тадбиркор ва юк ташувчиларга қулайликлар яратиш мақсадида Ўзбекистон-Қозоғистон давлат чегарасидаги ўтказиш пунктларида қурилиш ва реконструкция ишлари амалга оширилмоқда.
Бугунги кунда Сирдарё чегара божхона постида ходимлар кун-у тун хизмат олиб бормоқда ва божхона пости орқали 1 кунда ўрта ҳисобда 350–400 та юк автотранспорт воситаси ҳаракатланмоқда. Сирдарё чегара божхона пости орқали Қозоғистонга чиқиш йўналишида ҳаракатланган юк автотранспорт воситалари таҳлил қилинганда, 17 май куни жами 82 тонна гилос мевалари юкланган 4 та юк автотранспорт воситалари, 18 май куни соат 15:00 гача жами 45 тонна гилос меваси ортилган 2 та ва 21 тонна ўрик меваси ортилган 1 та юк автотранспорт воситалари ҳаракатлангани маълум бўлди.
Шунингдек, вилоятга яқин ҳудудлардан ортилган қишлоқ хўжалиги маҳсулотлари 1 суткага қолмасдан чегарадан чиқиб кетмоқда. Жумладан, Тошкент вилояти божхона бошқармасининг Янгийўл ТИФ божхона пости томонидан 17 май куни соат 20:31 да расмийлаштирилган 22,6 тонна гилос маҳсулоти юкланган юк автотранспорт воситаси 18 май куни соат 14:10 да Сирдарё чегара божхона пости орқали расмийлаштирилган ҳолда Қозоғистон давлатига чиқиб кетган.
Бундан ташқари, 18 май куни соат 16:00 ҳолатига Сирдарё чегара божхона постида Қозоғистонга чиқиш йўналишида жами 113 та экспортга қишлоқ хўжалиги маҳсулотлари ортилган юк автотранспорт воситалари, шундан 3 та ўрик ва 2 та гилос мевалари ортилган юк автотранспорт воситалари навбатда турибди.
Тошкент вилояти божхона бошқармаси тасарруфидаги Яллама чегара божхона пости орқали 1 кунда ўрта ҳисобда 900–1000 та, Нажимов чегара божхона пости орқали 300–400 та юк автотранспорт воситаси ҳаракатланмоқда.
18 май куни соат 16:00 ҳолатига Яллама чегара божхона постида Қозоғистонга чиқиш йўналишида 12 та қишлоқ хўжалиги маҳсулотлари, Нажимов чегара божхона постида 30 та қишлоқ хўжалиги маҳсулотлари юкланган автотранспорт воситалари экспортга расмийлаштирилиб, чиқиш учун навбатда турибди.
Божхона қўмитаси томонидан қишлоқ хўжалиги маҳсулотларини чегара божхона постларида навбатсиз расмийлаштириш йўлга қўйилган.
“Шунингдек, чегарадаги муаммолар ва тирбандликларни тезкорлик билан ҳал этиш мақсадида Божхона қўмитаси томонидан Telegram’да махсус гуруҳ очилганини маълум қиламиз ҳамда ушбу гуруҳда онлайн равишда қайси постда қанча автотранспорт воситалари навбатда тургани юзасидан маълумотлар бериб борилади. Сизлардан ушбу маълумотларга асосан иш кўришни тавсия қиламиз”, — дейилади хабарда.
Изоҳ (0)