Ўзбекистон ваколатли органлари билан келишилган ҳолда жисмоний шахслар, енгил автомобиллар, автобуслар ва юк кўтариш қуввати 3,5 тоннагача бўлган автотранспорт воситалари учун “Тажен” назорат-ўтказиш пункти орқали ҳаракатланиш вақтинча тўхтатилди. Бу ҳақда Қозоғистон Давлат божхона қўмитасига таяниб “Казинформ” хабар берди.
Қарор ўтказиш пунктида фуқаролар хавфсизлигини таъминлаш, қурилиш ва реконструкция ишларини жадаллаштириш мақсадида қабул қилинган.
Ҳозирда ҳудудда кенг кўламли ишлар: металл конструкцияларни ўрнатиш, муҳандислик тармоқларини ётқизиш, биноларни капитал таъмирлаш олиб борилмоқда, дейилади хабарда.
Бундан ташқари, май—август ойларида “Тажен” (Қозоғистон) ва “Довут ота” (Ўзбекистон) пунктлари ўртасидаги нейтрал полосада автомобиль йўли ётқизилади. Худди шундай ишлар Ўзбекистон томонидан ҳам амалга оширилиши режалаштирилган.
Қурилиш ишлари давом этаётгани муносабати билан Қозоғистон Ўзбекистон томонига расман мурожаат қилиб, чегарани кесиб ўтишга қўйилган чекловни яна 4 ойга — 2025 йил 1 сентябргача узайтиришни таклиф қилган. Ўзбекистон буни қўллаб-қувватлаган.
Фуқаролардан саёҳат ва йўналишларни режалаштиришда ушбу маълумотларни инобатга олишларини сўраймиз, дейилади хабарда.
“Тажен”—“Довут ота” ўтказиш пунктлари орқали енгил автотранспорт, автобуслар ва 3,5 тоннагача бўлган юк транспортининг кесишиши ва ўтиши 2025 йил 1 февралдан постни реконструкция қилиш даврида вақтинча тўхтатилганди.
Изоҳ (0)