Ўзбекистонда 24 май куни ўтказиладиган “Сўнгги қўнғироқ” тадбирларида хавфсизликни таъминлашга жами 27 мингдан ортиқ ИИВ, Миллий гвардия, ФВВ ходимлари ва ҳарбий хизматчилари жалб этилади. Бу ҳақда ИИВ Жамоат хавфсизлиги департаменти хабар берди.
24 май куни соат 08:00 дан 10:00 га қадар “Сўнгги қўнғироқ” байрам тадбирлари республикада фаолият олиб бораётган 10 мингдан ортиқ муассасада мактаб ўқувчилари, ота-оналар ҳамда жамоатчилик вакиллари иштирокида кенг нишонланиши белгиланган. Ушбу таълим муассасаларида 1-синф, 9-синф, 11-синф бўлган жами 2 миллиондан ортиқ битирувчи иштирок этиши кутилмоқда.
ИИВ Жамоат хавфсизлиги департаменти ахборот хизмати раҳбари Музифа Султонованинг маълум қилишича, тадбир ўтказиладиган таълим муассасалари тегишли мутасадди идоралар ходимлари томонидан тўлиқ текширувдан ўтказилиб, қўриқлаш пультига уланган. Видеокузатув камералари эса ҳудудий ички ишлар органларининг ситуацион марказларига интеграция қилинган.
Бундан ташқари, мактабларда ўқув йили якунланиши муносабати билан ёшлар хиёбонлар ва истироҳат боғларига ҳордиқ чиқариш учун келишлари кутилмоқда. Ушбу жойларда хавфсизликни таъминлашга жами 5 мингдан ортиқ ҳуқуқни муҳофаза қилувчи органлар ходимлари ва ҳарбий хизматчилар хизматга бириктирилди.
Ҳудудлардаги бевосита йўл четида жойлашган мактаблар олдида ҳаракат хавфсизлигини таъминлаш мақсадида ЙПХ инспекторлари кучайтирилган тартибда хизмат олиб боради. Мактабларнинг жойлашган жойига қараб транспорт воситаларининг ҳаракати вақтинча чекланади. Шу куни имкон қадар барчага жамоат транспортида ҳаракатланишлари тавсия этилади.
Барча ота-оналар ва катталардан битирувчиларнинг ярим тунгача истироҳат боғларида юришлари, спиртли ичимлик, тамаки маҳсулотлари ва тақиқланган моддаларни истеъмол қилишлари, кўчаларда гуруҳ-гуруҳ бўлиб кортежларда юришлари, автомашина, скутер, самокатларни олиб бошқаришлари, анҳор, канал ва чўмилиш ҳавзаларида сузишлари, ўзларининг ёнларида тиғли кесувчи, санчувчи ҳамда бошқа инсон ҳаёти ва соғлиғи учун хавфли бўлган буюмларни олиб юришларига йўл қўймасликлари сўралди.
“Сўнгги қўнғироқ” тадбирлари
Жорий ўқув йилининг охирги куни 25 май, якшанба – дам олиш кунига тўғри келганлиги сабабли “Сўнгги қўнғироқ” тадбирлари 24 май – шанба куни ўтказилиши белгиланган. Мактабгача ва мактаб таълими вазирлиги мактаблар жамоаларини, битирувчиларни, ота-оналарни тадбирлар жараёнида хавфсизлик қоидаларига риоя этишга чақирган. “Сўнгги қўнғироқ” тадбирларида валс тушишни тақиқланиши ҳақида хабар тарқалганди. Вазирлик матбуот хизмати валс тушиш тақиқланиши борасида ҳеч қандай ҳужжат йўқлигини, бироқ фарзандлари дарсдан сўнг қолиб рақс тушишни ўрганиши, тадбир учун қиммат кийимлар тиктириш, бунинг учун пул йиғиш ҳолатлари ота-оналар ҳақли эътирозларига сабаб бўлаётганини “Дарё”га билдириб ўтганди.
Изоҳ (0)