Бугун Ўзбекистондаги мавжуд умумтаълим мактабларида биринчи қўнғироқ саъдолари янграб, расман 2023/2024-ўқув йили бошланди. Ҳудудларда бўлиб ўтган биринчи қўнғироқ тадбирларида вилоят ҳокимлари ҳам кўриниш бериб, мактаб ўқувчиларини янги ўқув йили билан қутлади. “Дарё” шу кун муносабати билан вилоят ҳокимларининг ўқувчилик йилларини ёдга олди ва улар таҳсил олган мактабларни аниқлаштирди.
Сурхондарё вилояти ҳокими Улуғбек Қосимов Қашқадарёдаги мактабда таҳсил олган
Улуғбек Қосимовнинг матбуот котиби Муродбек Давлатовга кўра, Сурхондарё вилояти раҳбари Қашқадарё вилоятининг Қамаши туманидаги Ғофур Ғулом номидаги 76-мактабда таҳсил олган. 1990 йил 1-синфга бориб, биринчи қўнғироқ тадбирида иштирок этган Улуғбек Қосимов 2001 йил шу мактабнинг 11-синфини тамомлаб, сўнгги қўнғироқ жаранги остида катта ҳаётга қадам қўйган.
Тошкент вилояти ҳокими Зоир Мирзаев Самарқанддаги мактабда ўқиган
Тошкент вилояти ҳокими Зоир Мирзаевнинг “Дарё”га билдиришича, у ўзи туғилиб ўсган Самарқанд вилоятининг Жомбой туманидаги умумтаълим мактабида таълим олган.
1974 йил тумандаги 7-мактабнинг биринчи синфига борган Зоир Мирзаев шу мактабнинг 10-синфини 1985 йил тамомлаган.
Қашқадарё ҳокими ўзи раҳбарлик қилаётган вилоятдаги мактабда таълим олган
.jpg)
Айни кунда Қашқадарё вилоятига раҳбарлик қилиб келаётган Муроджон Азимов вилоятнинг Китоб туманидаги мактабларнинг бирини тамомлаган.
Ҳокимлик ахборот хизмати раҳбари Аҳрор Содиқовнинг маълумот беришича, Муроджон Азимов Китоб туманидаги Жайрахона қишлоғида жойлашган Абдулла Қодирий номидаги 49-сонли умумтаълим мактабида ўқиган. Вилоят ҳокими шу мактабнинг 11-синфини 1993 йил тамомлаган.
Сирдарё ҳокими Фарғонадаги мактабни тугатган
Сирдарё вилояти ҳокими Акмалжон Маҳмудалиев Фарғона вилоятининг Фарғона туманидаги Аввал қишлоғида жойлашган 38-умумтаълим мактабида таълим олган.
Ҳокимнинг “Дарё”га билдиришича, у 1980 йил шу мактабнинг 1-синфига бориб, 1991 йил мактабнинг 11-синфини тугатган.
Андижон ҳокими Шуҳрат Абдураҳмонов Пахтаободда таҳсил олган
Доимо шов-шувлар гирдобида юрувчи Андижон вилояти ҳокими Шуҳрат Абдураҳмонов ҳам аксарият ҳокимлар каби ўзи раҳбарлик қилаётган вилоятнинг Пахтаобод туманидаги мактабда таълим-тарбия олган.
“Дарё” мухбирининг аниқлаштиришича, вилоят ҳокими 1976 йил Пахтаобод туманидаги 31-умумтаълим мактабининг биринчи синфга қабул қилиниб, 1986 йилда ўша мактабнинг 10-синфини тамомлаган.
Наманган ҳокимининг ўқувчи сифатида биринчи қўнғироқ тадбирида иштирок қилганига 30 йил бўлди
Наманган вилояти ҳокими Шавкат Абдураззақовнинг мактабни тамомлаганига бу йил роппа-роса 30 йил тўлди. У 1983—1993 йилларда Наманган шаҳридаги 2-умумтаълим мактабида таҳсил олган.
Фарғона ҳокими Намангандаги мактаб битирувчиси ҳисобланади
“Дарё”нинг Фарғона вилоятидаги мухбири Азизжон Эрматовнинг маълумот беришича, Фарғона вилояти ҳокими Хайрулло Бозоров Наманган вилоятидаги мактаб битирувчиси ҳисобланади. У вилоятнинг Чортоқ туманидаги 9-умумтаълим мактабида таҳсил олган.
Бухоро ҳокими Ботир Зарипов Ғиждувондаги мактабда ўқиган
Бухоро вилояти ҳокимлиги ахборот хизмати раҳбари Олим Жўраевнинг “Дарё”га билдиришича, вилоят ҳокими Ботир Зарипов 1976 йил вилоятнинг Ғиждувон туманидаги 49-мактабга қадам қўйиб, шу мактабни тамомлаган.
Изоҳ (0)