Мактабгача ва мактаб таълими вазирлиги ижтимоий тармоқларда тарқалаётган Ўзбекистон мактабларида “Сўнгги қўнғироқ” куни билан боғлиқ хабарларга муносабат билдирди.
“Nemolchi.uz” лойиҳаси Ўзбекистондаги мактабларда “Сўнгги қўнғироқ” тадбирларида ўқувчиларнинг валс тушиши тақиқлангани ҳақида ёзганди. Бу ижтимоий тармоқларда кўплаб эътироз ва мунозараларга сабаб бўлди. Вазирликка кўра, бу каби тақиқлар “ҳеч қандай асосга эга эмас”.
Май ўрталарида Мактабгача ва мактаб таълими вазирлиги томонидан “Умумий ўрта таълим муассасаларида 2022/2023-ўқув йилини якунлаш ва “Сўнгги қўнғироқ” тадбирларини ўтказиш бўйича тавсиялар” ишлаб чиқилганди. Тавсияларда “Сўнгги қўнғироқ” тадбирларини, босқичли назорат имтиҳонлари ва якуний давлат аттестацияларини ўтказишда, таълим муассасаларини янги ўқув йилига тайёрлаш борасида ўқувчи ва битирувчилар ҳамда уларнинг ота-оналаридан турли хил пул йиғимларига йўл қўймаслик белгиланган.
Бундан олдин Тошкент шаҳар мактабгача ва мактаб таълими бошқармаси Юнусобод туманидаги мактаблардан бирининг маъмурияти ота-оналардан “Сўнгги қўнғироқ” тадбири учун пул йиғаётгани айтилган хабарларга муносабат билдирганди.
Ижтимоий тармоқларда хабар тарқалгач, мактаб маъмурияти томонидан навбатдан ташқари педагоглар кенгаши ҳамда ота-оналар кузатув кенгашларининг йиғилишлари ўтказилган. Синф раҳбарлари ва ўқитувчилар ота-оналардан “Сўнгги қўнғироқ” ва бошқа тадбирлар учун ҳеч қандай пул йиғимларини амалга оширмасликлари бўйича яна бир маротаба огоҳлантирилган. Агар шундай ҳолатга йўл қўйилса, унинг иштирокчи ва ташаббускорларига нисбатан қонун доирасида чора кўрилиши эслатиб ўтилган.
Изоҳ (0)