Ўзбекистон мактабларида 25 май куни бўлиб ўтадиган “Сўнгги қўнғироқ” тадбирларида валс тушишни тақиқланиши ҳақида хабар таралганди. “Дарё” Мактабгача ва мактаб таълими вазирлиги ахборот хизмати билан боғланиб бу масалага аниқлик киритди.
Вазирлик матбуот хизматининг билдиришича, “Сўнгги қўнғироқ” тадбирларида валс тушиш тақиқланиши борасида ҳеч қандай ҳужжат йўқ. Бироқ фарзандлари дарсдан сўнг қолиб рақс тушишни ўрганиши, тадбир учун қиммат кийимлар тиктириш, бунинг учун пул йиғиш ҳолатлари ота-оналар ҳақли эътирозларига сабаб бўлмоқда.
Мактабгача ва мактаб таълими вазирлиги томонидан умумий ўрта таълим муассасаларида ўқув йилини якунлаш ва “Сўнгги қўнғироқ” тадбирларини юқори савияда тартибли ўтказиш ва ўқувчилар хавфсизлигини таъминлаш мақсадида тегишли тавсиялар ҳамда тадбирларни ўтказиш бўйича намунавий сценарийлар тайёрланиб, таълим ташкилотларига етказилади.
Бу тавсияларда вазирлик томонидан мактабларда “Сўнгги қўнғироқ” тадбирлари давомида ўқувчиларнинг рақс (валс)га тушишларини тақиқлаш бўйича алоҳида кўрсатма берилмаган. Тадбир сабаб ортиқча нарсаларга чалғишлар бўлса, мактаб маъмуриятининг ўзи бунга тақиқ қўйиши мумкин.
“Дарҳақиқат, мактаб бу таълим маскани, ўқув йилини якунларига бағишлаб ўтказиладиган тадбир — бу энг аввало маърифат байрами, таълим берган устозларга эҳтиром кўрсатиш байрами ҳисобланади. Мазкур тадбирга битирувчи синф ўқувчиларининг валс тушишининг ҳеч бир мантиқан боғлиқлиги йўқ”, дейилади вазирлик изоҳида.
Шунинг учун мактаб раҳбарияти томонидан ота-оналарнинг ҳақли эътирозларини инобатга олган ҳолда “Сўнгги қўнғироқ” тадбирларида таълимга алоқаси бўлмаган ўқувчиларни валсга тушиш “анъана”ларига йўл қўймаслик бўйича тадбир сценарийларига тегишли тақиқловчи талаблар киритилиши мумкин.
Мактаблардаги “Сўнгги қўнғироқ” тадбирларида ўқувчиларнинг валс тушиши тақиқлангани ҳақидаги миш-мишлар бундан бир неча йил аввал ҳам тарқалиб, кўплаб эътироз ва мунозараларга сабаб бўлганди.
Изоҳ (0)