“Манчестер Юнайтед” Европа Лигаси финалида “Тоттенҳэм”га 0:1 ҳисобида мағлуб бўлди. Шундан кейин манкунианликлар устози Рубен Аморим ишончни оқламаган бир нечта футболчи жамоадан кетишини истамоқда. Бу ҳақда Give me Sport нашрига таяниб Championat хабар берди.
Маълумотларга кўра, дарвозабон Андре Онана, ҳимоячи Люк Шоу, ярим ҳимоячи Каземиро ва ҳужумчи Расмус Ҳойлунд мавсум якунлангач, “қизил иблислар” сафини тарк этиши мумкин.
Клуб Ҳойлундни сотиш вариантини кўриб чиқмоқда, аммо харидор топилмаса, уни ижарага бериш эҳтимоли ҳам мавжуд. Каземиро ва Шоу юқори маош олади. Шунинг учун уларни сотиш бир оз қийин кечиши айтилмоқда. Шу билан бирга, “Манчестер Юнайтед” Онанага бўлган таклифларни кўриб чиқишга тайёр.
Клуб захира дарвозабони Алтай Байиндирнинг ҳам ёзда жамоани тарк этиши мумкинлигини ҳисобга олиб, “қизил иблислар” ёзги трансфер ойнаси вақтида иккита посбон қидиришга мажбур бўлмоқда.
Маълумот учун, “Манчестер Юнайтед” 37-турдан кейин Англия Премьер Лигаси турнир жадвалида 16-поғонани эгаллаб турибди. Клуб Европа Лигаси финалига чиққан эди, аммо ҳал қилувчи баҳсда “Тоттенҳэм”га 0:1 ҳисобида имкониятни бой берди.
Изоҳ (0)