Беш карра “Олтин тўп” соҳиби Криштиану Роналдунинг тўнғич фарзанди — Португалия терма жамоаси сафида илк совринини қўлга киритди. Бу ҳақда ТCR нашрига таяниб Championat хабар берди.
Яқинда 14 ёшга тўлган кичик Криштиану илк бор Португалия U-15 терма жамоасидан чақирув олди. Европанинг турли ёш тоифаларидаги терма жамоалари иштирок этган халқаро турнир финалида португалияликлар Хорватия U-15 жамоасига қарши майдонга тушди. Учрашув 3:2 ҳисобида Португалия фойдасига якунланди.
Энг эътиборлиси шундаки, Криштиану Жуниор бу баҳсда дубль қайд этди. У 13 ва 44-дақиқаларда хорватлар дарвозасини ишғол қилишга муваффақ бўлди. Бу натижа билан у халқаро майдондаги ўзининг илк совринини қўлга киритди.
Ушбу муваффақият фонида, унга отаси тўп сурган “Реал Мадрид” клуби қизиқиш билдирмоқда. Маълумотларга кўра, Мадрид клуби скаутлари унинг Португалия сафидаги дебют учрашувини бевосита стадиондан кузатишган. Defensa Central нашрининг таъкидлашича, “қироллик клуби” президенти Флорентино Перес скаутлик хизматига ёш футболчининг муваффақиятини диққат билан кузатишни буюрган.
Шунингдек, кичик Роналдунинг Хорватиядаги турнирдаги ҳаракатлари “Бавария”, “Боруссия Дортмунд”, “Ювентус”, “Интер”, “Манчестер Юнайтед”, “Зальцбург”, “Ҳоффенхайм” каби клубларнинг скаутлари эътиборидан ҳам четда қолмаган.
Изоҳ (0)