Ўзбекистонда иссиқлик энергияси билан таъминлаш соҳаси тубдан янгиланади 

Иссиқлик энергияси билан таъминлаш соҳаси тубдан ислоҳ қилинади, деб хабар бермоқда Адлия вазирлиги. 

“Уй-жой ҳамда бино-иншоотларни иссиқлик энергияси билан таъминлаш соҳасини тубдан ислоҳ қилиш ҳамда биноларнинг энергия самарадорлигини ошириш чора-тадбирлари тўғрисида”ги президент қарори қабул қилинди.

Қарорга кўра, уй-жой ва бино-иншоотларни иссиқлик энергияси билан барқарор таъминлаш ҳамда биноларнинг энергия самарадорлигини оширишнинг келгуси 5 йилдаги асосий йўналишлари этиб қуйидагилар белгиланди, жумладан:

• соҳада ягона давлат сиёсатини юритиш, илғор хорижий тажрибалар асосида стратегик таклифларни ишлаб чиқиш, иссиқлик таъминоти корхоналари фаолиятини бошқарувчи ва мувофиқлаштирувчи ташкилот ташкил этиш; 
• марказлашган иссиқлик таъминотига уланмаган тўрт ва ундан юқори қаватли кўп квартирали уй-жойларнинг иситиш тизимида локал қозонхоналар қуриш ва бошқа муқобил технологияларни жорий этиш ҳисобига бир хонадоннинг газга бўлган талабини камида 20 фоизга камайтириш.

Қуйидаги тадбирлар амалга оширилади, жумладан:

• марказлашган иссиқлик тизимларидаги эскирган 103 та қозонхона ва 1,6 минг километр иссиқлик тармоғи янгиланади;
• давлат-хусусий шериклик асосида 9 та, халқаро молия институтлари иштирокида 13 та шаҳар ва туманда модернизация лойиҳалари амалга оширилади;
• марказлашган иссиқлик таъминоти қамрови 37 фоиздан 58 фоизгача етказилади, тизимдаги йўқотишлар 38 фоиздан 20 фоизгача қисқартирилади.

Ўзбекистонда табиий газ учун иситиш мавсумида белгиланган базавий меъёр 1 апрелга қадар узайтирилди. 

23 январь куни президент раислигида бўлиб ўтган видеоселектор йиғилишида 18 минг хонадон газда индивидуал иситиладиган қилиб қурилгани учун фойдаланишга қабул қилинмай тургани айтилганди. Мутасаддиларга ишчи гуруҳи тузиб, ҳар бир ҳолатни ўрганиб, масаланинг ечими бўйича ҳукуматга таклиф киритиш топширилди. Бу йил 135 минг хонадонли кўп қаватли уйларни марказлашган ҳолда иситиладиган, овқат пишириш эса электр плитаси орқали бўладиган қилиб қуриш зарурлиги қайд этилганди.

“Янги қуриладиган уйларда энергия манбаси сифатида фақат электр энергиясини рағбатлантириш таклифини қўллаб-қувватлаймиз”, деган эди Алишер Қодиров.

Қурилиш вазирлигининг “Газета.уз”га маълум қилишича, Қорақалпоғистон, вилоятлар ва Тошкент шаҳрида 2025 йилда кўп қаватли уйларда 120 минг хонадон қуриш режалаштирилган.

Президентнинг 2021 йил 9 декабрдаги “Янги Ўзбекистон” турар жой массивларини ташкил этиш тўғрисидаги фармонига асосан 29 минг хонадон марказлаштирилган иситиш тизими билан таъминланади.

Янги Тошкентда 15 минг хонадон бир вақтнинг ўзида электр энергияси, иссиқлик ва совуқлик ишлаб чиқарадиган тригенерация тизими орқали иситилади ва совитилади. 

Уй-жойга талаб юқори бўлган ҳудудларда 91 минг хонадон қурилади. Марказлаштирилган иситиш тизимига эга ҳудудларда жойлашган янги бинолар шаҳар қозонхоналарига уланиш учун техник шартларни олади. Марказлаштирилган иссиқлик таъминотига уланмаган ҳудудларда янги қозонхоналар қурилади.

Қурилиш вазирлиги марказлаштирилган қозонхоналарнинг афзалликлари сифатида ёқилғидан фойдаланишда мослашувчанлик (табиий газ, кўмир, мазут), хавфсиз ва барқарор иссиқлик таъминоти, якка тартибдаги қозонлардан икки баравар кам газ сарфини айтди.

Шавкат Мирзиёев барча ҳудудларда янги қурилаётган кўп қаватли уйларни босқичма-босқич “яшил энергия” уйларига айлантириш муҳимлигини ҳам таъкидлаганди. Буни рағбатлантириш мақсадида қуриладиган уй-жойни энергия билан таъминлаш учун қуёш электр станциялари билан шартнома тузган девелоперларга бундай уйлар учун фойда солиғи олинмайди, кредит ставкаси 2 фоиз арзон қилиб берилади. Натижада девелопернинг харажати камаяди, ундан уй олган одамларга эса электр арзонроқ бўлади.