Олий Мажлис Қонунчилик палатаси спикери ўринбосари, “Миллий тикланиш” демократик партияси фракцияси раҳбари Алишер Қодиров болаларга хорижий тилларни, хусусан, рус тилини ўргатиш борасидаги фикрлари билан бўлишди.
Советафоб эканлигимни тан оламан! Совет давлати тарихимиз, тўғри, лекин тарихимизнинг қора қоғозларида қолиб кетиши, келажагимизда бўлмаслиги керак деб ҳисоблайман.
Россия катта ва қудратли қўшнимиз. Россия билан яхши қўшничилик, умумий манфаатлар ва ҳамкорликда ривожланишдан манфаатдормиз, албатта. Айрим масала ва мақсадларда бир хил ўйламаслигимиз ҳам табиий, улар бўйича келишиш, ўрта нуқталарни топиш халқ ваколат берган ҳукуматнинг маҳоратига боғлиқ, — деб ёзади Алишер Қодиров.
Шунингдек, “Миллий тикланиш” партияси Россия—Украина муносабатлари ҳақида ҳам тўхталган.
Ўзбекистон ҳар қандай ҳолатда ҳам ўз манфаатини ўйлаб тўғри қилмоқда. Ҳар қандай уруш келишув билан якунланади. Ақлли бошқарув урушгача бормайди, — дейди у.
Россия президентининг Ўзбекистонга ташрифи давомида эришилган келишувлар мамлакат манфаатларига хизмат қилишини билдирди.
Рус тили масаласида…
Рус тилини ўрганиш ёшларимиз учун инглиз, хитой, араб ва форс тилларини ўрганиш қаторида жуда фойдали эканлигини ҳеч қачон рад этмаганман, бундан кейин ҳам рад этмайман.
Таклифим эса оддий ва тушунарли, болаларга болалигидан она тили ва давлат тилидан бошқа тил ўргатилмаслиги керак. Бошқа миллатли ватандошларимиз она тилида қадриятини ўргансин, давлат тилини эса ватани деб ҳисоблайдиган Ўзбекистонда яхши яшаши учун ўргансин, тамом.
Мактабни ўрта синфларидан бошлаб истаган хорижий тилини ўрганса, шахсий ривожланишига ҳам, мамлакат тараққиётига ҳам фақат фойда бўлади.
Россия президентининг Ўзбекистонга ташрифи давомида эришилган келишувлар Ўзбекистон манфаатларига хизмат қилишига шубҳам йўқ. Мураккаб даврда, ҳеч кимни қош-у қовоғига қарамасдан халқимиз манфаатларига уйғун ҳаракатлар давлат раҳбарининг ички ва ташқи сиёсатини қўллаб-қувватлашимизга энг муҳим сабабларидан бири, — дея таъкидлайди Алишер Қодиров.
Бундан олдин Алишер Қодиров таълим ва телевидениеда рус тилидан фойдаланишни қисқартириш таклифини берган эди. Ўшанда у 3 фоизга ҳам бормайдиган рус ватандошлар учун таълим ва телевидениеда рус тили номутаносиб даражада кўплигини таъкидлаганди.
Февраль ўрталарида эса Журналистика ва оммавий коммуникациялар университети ректори Шерзодхон Қудратхўжа Alter Ego лойиҳасига берган интервьюсида ўзи яшаётган мамлакат тилини билмайдиганлар “босқинчи ёки аҳмоқ” бўлишини айтганди. Кўп ўтмай “Россотрудничество” у билан барча алоқаларни тўхтатганини маълум қилди.
Изоҳ (0)