Ўзбекистон Кубогининг гуруҳ босқичи, 3-туридан ўрин олган баҳсни “Навбаҳор” жамоаси ўз майдонида яқин ўтмишнинг таниқли ўйинчилари – Сергей Лебедев ҳамда Абдусамад Дўрмонов мураббийлик қилаётган “ФарДУ” (Фарғона)га қарши ўтказди.
“Лочинлар” илк дақиқалардан бошлаб фарғоналиклар дарвозаси олдида хавфли вазиятларни яратишга интилди. Меҳмонлар эса баҳснинг биринчи бўлимида муносиб қаршилик кўрсатди. Натижада жамоалар танаффусга дуранг – 0:0 ҳисобида йўл олди.
“Навбаҳор устози Сергей Лушан ўйинга ўзгартириш мақсадида учрашувнинг 2-бўлимида таркибда бир қатор ўзгаришларни амалга оширди. Бу эса ўз самарасини бериб, айнан захирадан майдонга тушган футболчилар ўйинда бурилиш ясай олди.
Беллашувнинг 65-дақиқасида Алишер Одиловнинг чап қанотдан жарима майдончаси ичига етказиб берган тўпини Забиҳилло Ўринбоев дарвозага аниқ йўллаб, ҳисобни очди – 1:0.
Ушбу голдан руҳланган Сергей Лушан шогирдлари ҳужумни кучайтирди. Мезбонларнинг навбатдаги ҳужумларидан бирида Русланбек Жиянов 18 метрлар чамаси узоқликдан кучли зарба йўллаб, дарвозани аниқ нишонга олган ҳисобдаги фарқни оширди – 2:0.
Орадан 5 дақиқа ўтар-ўтмас, Русланбек Жияновнинг ўнг қанотдан оширган тўпини Алишер Одилов дарвозага аниқ йўллаб, ҳисобнинг йирик кўриниш олишини таъминлади – 3:0.
Учрашувнинг асосий вақтига ҳакам томонидан қўшиб берилган дақиқалар давом этаётган пайтда “ФарДУ” ярим ҳимоячиси Шерзод Қодиров гол уриб, ҳисобдаги фарқни қисқартирди – 3:1.
Шу тариқа, “Э” гуруҳида 7 тадан очко тўплаган “Нефтчи” ва “Навбаҳор” жамоалари “плей-офф” босқичига йўл олди.
“Дарё” “Навбаҳор” ва “ФарДУ” жамоалари ўртасидаги ўйиндан фотогалерея тайёрлади.
Изоҳ (0)