Ўзбекистонда янги қуриладиган уйларни марказлаштирилган исиққлик таъминоти тизимига улаш орқали аҳоли турар жойларида электр энергиясидан оқилона фойдаланишга ўтиш режалаштирилмоқда. Бу президентнинг 21 февралдаги фармони билан тасдиқланган “йўл харитаси”да кўзда тутилган.
Унга кўра, 2025 йилда қуриладиган 135 мингта квартирали уй-жойларни марказлашган иссиқлик таъминотига улаш режалаштирилган. Бунда хавфсизлик нуқтаи назаридан хонадонларнинг ошхонаси электр плиталари билан жиҳозланиши назарда тутилган.
Аҳоли яшаш пунктларидаги ички йўллларни ёритиш учун электр энергия сарфини икки карра қисқартириш ҳам режалаштирилган. Тегишли таклифлар 2025 йил 1 апрелгача президент администрациясига тақдимот қилиниши керак.
Республиканинг ҳар бир ҳудудида камида иккитадан лифтларни қабул қилиш ва хизмат кўрсатиш гуруҳлари ташкил этилади. Соҳани зарур мутахассислар билан таъминлаш учун республиканинг ҳар бир ҳудудида камида 20 кишини лифтларга хизмат кўрсатиш ва таъмирлаш бўйича ўқитиш йўлга қўйилади.
23 январь куни президент раислигида бўлиб ўтган видеселектор йиғилишида 18 минг хонадон газда индивидуал иситиладиган қилиб қурилгани учун фойдаланишга қабул қилинмай тургани айтилганди. Мутасаддиларга ишчи гуруҳи тузиб, ҳар бир ҳолатни ўрганиб, масаланинг ечими бўйича ҳукуматга таклиф киритиш топширилди. Бу йил 135 минг хонадонли кўп қаватли уйларни марказлашган ҳолда иситиладиган, овқат пишириш эса электр плитаси орқали бўладиган қилиб қуриш зарурлиги қайд этилганди.
“Янги қуриладиган уйларда энергия манбаси сифатида фақат электр энергиясини рағбатлантириш таклифини қўллаб-қувватлаймиз”, деган эди Алишер Қодиров.
Қурилиш вазирлигининг “Газета.уз”га маълум қилишича, Қорақалпоғистон, вилоятлар ва Тошкент шаҳрида 2025 йилда кўп қаватли уйларда 120 минг хонадон қуриш режалаштирилган.
Президентнинг 2021 йил 9 декабрдаги “Янги Ўзбекистон” турар жой массивларини ташкил этиш тўғрисидаги фармонига асосан 29 минг хонадон марказлаштирилган иситиш тизими билан таъминланади.
Янги Тошкентда 15 минг хонадон бир вақтнинг ўзида электр энергияси, иссиқлик ва совуқлик ишлаб чиқарадиган тригенерация тизими орқали иситилади ва совутилади.
Уй-жойга талаб юқори бўлган ҳудудларда 91 минг хонадон қурилади. Марказлаштирилган иситиш тизимига эга ҳудудларда жойлашган янги бинолар шаҳар қозонхоналарига уланиш учун техник шартларни олади. Марказлаштирилган иссиқлик таъминотига уланмаган ҳудудларда янги қозонхоналар қурилади.
Қурилиш вазирлиги марказлаштирилган қозонхоналарнинг афзалликлари сифатида ёқилғидан фойдаланишда мослашувчанлик (табиий газ, кўмир, мазут), хавфсиз ва барқарор иссиқлик таъминоти, якка тартибдаги қозонлардан икки баравар кам газ сарфини айтди.
Шавкат Мирзиёев барча ҳудудларда янги қурилаётган кўп қаватли уйларни босқичма-босқич “яшил энергия” уйларига айлантириш муҳимлигини ҳам таъкидлаганди. Буни рағбатлантириш мақсадида қуриладиган уй-жойни энергия билан таъминлаш учун қуёш электр станциялари билан шартнома тузган девелоперларга бундай уйлар учун фойда солиғи олинмайди, кредит ставкаси 2 фоиз арзон қилиб берилади. Натижада девелопернинг харажати камаяди, ундан уй олган одамларга эса электр арзонроқ бўлади.
Изоҳ (0)