Ўзбекистон ва Қирғизистон чегарасида трейлернинг (юк машинаси) тормози ишламай қолиши оқибатида йўл-транспорт ҳодисаси содир бўлди. Бу ҳақда ИИВ матбуот котиби хабар қилди.
Маълум қилинишича, 2022 йилнинг 21 май куни соат тахминан 15:30 ларда, Қирғизистон Республикаси Баткен вилояти Қадамжой тумани орқали Ўзбекистоннинг Сўх тумани ҳудудига ҳаракатланиб келаётган, устига бульдозер юкланган трейлер автотранспортининг тормоз ускунаси ишдан чиқиб, ҳайдовчиси бошқарувни йўқотган.
Оқибатда Қирғизистон Республикаси «Чечме» чегара ўтказиш пункти ва Ўзбекистон Республикаси «Чашма» чегара ўтказиш пункти орқали рўйхатдан ўтиш учун навбатда турган жами 12 та (2 та Ўзбекистон ва 10 та Қирғизистон Республикаси) автомашиналарга урилиб, уларга шикаст етказган.
Автоҳалокат оқибатида, бирламчи маълумотларга кўра, 9 нафар фуқаро (шулардан, 1 нафари Ўзбекистон Республикаси, қолган 8 нафари Қирғизистон Республикаси фуқароси) вафот этган.
Жароҳатланганларга тез-тиббий ёрдам кўрсатилиши таъминланган. Ҳолат юзасидан терговга қадар суриштирув ишлари олиб борилмоқда.
Изоҳ (0)