Қозоғистонда одамлар бўлган автомобиль дарёга қулаб тушди

Қозоғистоннинг Абай вилояти Иртиш дарёсига тушиб кетган икки йўловчи автомобили қидирилмоқда. Бу ҳақда Tengrinews хабар берди.

ФВВ матбуот хизматига кўра, ҳодиса 5 январь куни соат 06:00 ларда юз берган. Енгил автомобиль ҳайдовчиси бетон тўсиққа урилиб, дарёга қулаб тушган. ЙТҲ вақтида салон ичида 4 киши бўлган. Йўловчилардан бири машинадан ўзи чиқиб, қирғоққача сузиб борган. У тиббий ёрдамга муҳтож бўлмаган.

“Ҳодиса ҳақида хабар келиб тушгач, ФВВ ходимлари зудлик билан воқеа жойига чиқиб, қидирув-қутқарув ишларини бошлаган. Қидирув гуруҳи соат 09:00 да бир нафар марҳумнинг жасадини топиб, сувдан олиб чиққан ва кейинги тергов ҳаракатларини ўтказиш учун полиция органларига топширган”, дейилади хабарда.

Ҳозирда қутқарув операциясига 55 нафар қутқарувчи, 5 та сузиш воситаси, 2 та дрон, сувости қидирувлари учун эхолот, 10 та техника жалб қилинган.

Операцияни кучайтириш учун қўшимча равишда 68303-ҳарбий қисмдан Қозоғистон Фавқулодда вазиятлар вазирлиги ҳарбийлари жалб қилинган, шунингдек, Шарқий Қозоғистон вилоятидан қутқарув бўлинмалари келиши кутилмоқда.