Шавкат Мирзиёев келгуси беш йилда Ўзбекистонда олий тоифали ўқитувчиларнинг маошини эквивалент ҳисобида минг долларга етказилишини маълум қилди. Бу ҳақда давлат раҳбари Сенатнинг янги биносида қасамёддан сўнг, сўзлаган нутқида таъкидлаб ўтган, деб хабар беради «Дарё» мухбири.
Давлат раҳбари ёшлар тақдирини ҳал қиладиган юксак малакали муаллим ва мураббийлар, профессор-ўқитувчилар, ҳақиқий зиёлилар кераклигини таъкидлаб, ушбу заҳматкаш, фидойи инсонлар олдида ҳали қарздорлигини маълум қилган.
«Шу боисдан ҳам, қанчалик қийин бўлмасин, ўқитувчилар меҳнатини муносиб рағбатлантириш учун бор куч ва имкониятларимизни сафарбар этамиз. 2025 йилга бориб, олий тоифали ўқитувчиларнинг ойлик маошини эквивалент ҳисобида 1000 долларга етказиш чоралари кўрилади», — дейди Шавкат Мирзиёев.
Шу билан бирга, Президентнинг таъкидлашича, боғча тизимини мактаб таълими билан уйғунлаштириш орқали болаларни мактабга тайёрлаш сифатини янада яхшиланади. Мамлакатнинг ҳамма ҳудудларида ўнлаб янги-янги мактабгача таълим муассасалари барпо этилади. Барча боғчалар ҳар йили 2 миллион нусхадаги замонавий ўқув адабиётлари билан таъминлаб борилади.
«Мактабгача таълимдаги қамров даражасини ҳозирги 62 фоиздан камида 80 фоизга, олий таълим тизимида эса 50 фоизга етказиш, мактабларда таълим-тарбия сифати ва даражасини оширишга биз бирламчи вазифа деб қараймиз.
Янги олий таълим муассасаларини ташкил этиш билан бирга, талабаларни турар-жой билан таъминлаш бўйича бошлаган ишларимизни жадал давом эттирамиз», — дейди давлат раҳбари.
Шавкат Мирзиёев аҳоли саломатлигини таъминлаш бундан буён ҳам бош вазифа бўлиб қолиши, ушбу соҳага йўналтириладиган маблағларни 2 баробар ошириш, жумладан, келгуси беш йилда олий тоифали шифокорлар маошини эквивалент ҳисобида 1000 долларга етказиш мўлжаллангаётганини билдирган.
Аввалроқ Шавкат Мирзиёев фарғоналик сайловчилар билан учрашув чоғида ўқитувчиларнинг маошини 1000 долларга етказмагунча тўхтамаслигини маълум қилган эди. Шунингдек, у тиббиётда янгича тартиб йўлга қўйилишини билдирганди.«Халқимиз содда, шифокор давлат томонидан ажратилган ўнта доридан учтасини берса ҳам рози бўлиб кетаверади. Энди янгича тартиб жорий қиламиз — пулни шифохонага эмас, беморга берамиз», — деган эди Шавкат Мирзиёев.
2020 йилнинг ноябрида ўқитувчилар ва шифокорлар билан учрашувда Президент уларнинг маошини ошириш бўйича катта режалар ҳақида эълон қилган эди. «Ўқитувчи 1000 доллар олмаса, ишга келмаслиги керак. Худди шу ҳолат шифокор билан. Агар шифокор 1000 доллар олмаса, эртага болалари ва невараларини қандай боқади?» — деган эди Президент. Ўшанда Шавкат Мирзиёев кўпчилик мамлакатдаги тиббий хизматлар сифатидан норози эканини танқид қилганди.
Изоҳ (0)