O‘zbekistondagi ayrim o‘qituvchilar bir qator ustamalar joriy etilgani sabab 20 million so‘m atrofida maosh olish imkoniga ega bo‘ldi.
Xususan, Surxondaryoda ayni paytda 2 ming dollardan ortiq oladigan 11 nafar o‘qituvchi bor. Bu haqda viloyat ta’lim boshqarmasi boshlig‘i Husniddin Mamadiyev 15-may kuni bo‘lib o‘tgan videoselektor yig‘ilishida prezidentga ma’lum qildi.
“Hurmatli prezident, shuni alohida ta’kidlashimiz kerak, bizning Surxondaryoda 2 ming dollardan ortiq oladigan 11 ta o‘qituvchimiz bor. Buni OAVda ham ko‘rsatdik. Undan tashqari, 600 ga yaqin ming dollardan ortiq oladigan o‘qituvchilarimiz mavjud”, deya uning so‘zlari keltirilgan “O‘zbekiston24” telekanali efirida.
Telekanal 18-may kuni Namanganda ham 20 million so‘m atrofida oylik olayotgan o‘qituvchilar haqida reportaj e’lon qildi. Jumladan, Namangan viloyatining Namangan tumanidagi maktabda ishlovchi fransuz tili o‘qituvchisi Zamira Hamidova 22 million so‘mdan ortiq oylik maosh oladi. Uning ta’kidlashicha, avvallari o‘qituvchilar majburiy mehnatga jalb etilgani, oylik kam bo‘lgani uchun boshqa kasbga o‘tib ketish fikrida bo‘lgan.
Viloyatning Kosonsoy tumanidagi igliz tili o‘qituvchisi Nigora Egamova esa 20 million so‘mdan ortiq maosh oladi.
“Bir necha yil avval, 5 million atrofida oylik oladigan paytimda kuni kelib 20 million oylik olaman deb o‘ylamagandim. Bu kun orzu edi, endi haqiqatga aylandi” deydi u.
Reportajda aytilishicha, ming dollar oylik maosh oluvchi o‘qituvchilar soni 60 ming nafardan oshdi. Namangan viloyatining Uchqo‘rg‘on tumanidagi davlat ixtisoslashtirilgan maktab-internatida tarix fanidan dars beruvchi Nozimjon Tojiboyev ko‘zi ojizligiga qaramay, 1000 dollar maoshga erishganini “Daryo”ga so‘zlab bergandi.
Davlat rahbari raisligidagi videoselektor yig‘ilishida malaka, til bilish, yangi baholash tizimi, fan olimpiadalari kabi mezonlar asosida o‘qituvchilarga 10 dan ortiq ustama joriy qilingani, bundan samarali foydalangan 60 ming o‘qituvchi hozirda 8-12 million so‘m maosh olayotgani qayd etib o‘tildi.
Shavkat Mirziyoyev 2025-yilga borib oliy toifali o‘qituvchilarning maoshini ekvivalent hisobida ming dollarga yetkazilishini 2021-yilda, Senat binosida qasamyoddan so‘ng ta’kidlab o‘tgandi.
“Qanchalik qiyin bo‘lmasin, o‘qituvchilar mehnatini munosib rag‘batlantirish uchun bor kuch va imkoniyatlarimizni safarbar etamiz. 2025-yilga borib, oliy toifali o‘qituvchilarning oylik maoshini ekvivalent hisobida 1000 dollarga yetkazish choralari ko‘riladi”, degan edi prezident.
Milliy statistika qo‘mitasi hisobotiga ko‘ra, 2025-yilning birinchi choragida ta’lim sohasidagi o‘rtacha oylik ish haqi 4 mln 44 ming so‘mni tashkil etgan.
Izoh (0)