Shavkat Mirziyoyev kelgusi besh yilda O‘zbekistonda oliy toifali o‘qituvchilarning maoshini ekvivalent hisobida ming dollarga yetkazilishini ma’lum qildi. Bu haqda davlat rahbari Senatning yangi binosida qasamyoddan so‘ng, so‘zlagan nutqida ta’kidlab o‘tgan, deb xabar beradi “Daryo” muxbiri.
Davlat rahbari yoshlar taqdirini hal qiladigan yuksak malakali muallim va murabbiylar, professor-o‘qituvchilar, haqiqiy ziyolilar kerakligini ta’kidlab, ushbu zahmatkash, fidoyi insonlar oldida hali qarzdorligini ma’lum qilgan.
“Shu boisdan ham, qanchalik qiyin bo‘lmasin, o‘qituvchilar mehnatini munosib rag‘batlantirish uchun bor kuch va imkoniyatlarimizni safarbar etamiz. 2025-yilga borib, oliy toifali o‘qituvchilarning oylik maoshini ekvivalent hisobida 1000 dollarga yetkazish choralari ko‘riladi”, — deydi Shavkat Mirziyoyev.
Shu bilan birga, Prezidentning ta’kidlashicha, bog‘cha tizimini maktab ta’limi bilan uyg‘unlashtirish orqali bolalarni maktabga tayyorlash sifatini yanada yaxshilanadi. Mamlakatning hamma hududlarida o‘nlab yangi-yangi maktabgacha ta’lim muassasalari barpo etiladi. Barcha bog‘chalar har yili 2 million nusxadagi zamonaviy o‘quv adabiyotlari bilan ta’minlab boriladi.
“Maktabgacha ta’limdagi qamrov darajasini hozirgi 62 foizdan kamida 80 foizga, oliy ta’lim tizimida esa 50 foizga yetkazish, maktablarda ta’lim-tarbiya sifati va darajasini oshirishga biz birlamchi vazifa deb qaraymiz.
Yangi oliy ta’lim muassasalarini tashkil etish bilan birga, talabalarni turar-joy bilan ta’minlash bo‘yicha boshlagan ishlarimizni jadal davom ettiramiz”, — deydi davlat rahbari.
Shavkat Mirziyoyev aholi salomatligini ta’minlash bundan buyon ham bosh vazifa bo‘lib qolishi, ushbu sohaga yo‘naltiriladigan mablag‘larni 2 barobar oshirish, jumladan, kelgusi besh yilda oliy toifali shifokorlar maoshini ekvivalent hisobida 1000 dollarga yetkazish mo‘ljallangayotganini bildirgan.
Avvalroq Shavkat Mirziyoyev farg‘onalik saylovchilar bilan uchrashuv chog‘ida o‘qituvchilarning maoshini 1000 dollarga yetkazmaguncha to‘xtamasligini ma’lum qilgan edi. Shuningdek, u tibbiyotda yangicha tartib yo‘lga qo‘yilishini bildirgandi.“Xalqimiz sodda, shifokor davlat tomonidan ajratilgan o‘nta doridan uchtasini bersa ham rozi bo‘lib ketaveradi. Endi yangicha tartib joriy qilamiz — pulni shifoxonaga emas, bemorga beramiz”, — degan edi Shavkat Mirziyoyev.
2020-yilning noyabrida o‘qituvchilar va shifokorlar bilan uchrashuvda Prezident ularning maoshini oshirish bo‘yicha katta rejalar haqida e’lon qilgan edi. “O‘qituvchi 1000 dollar olmasa, ishga kelmasligi kerak. Xuddi shu holat shifokor bilan. Agar shifokor 1000 dollar olmasa, ertaga bolalari va nevaralarini qanday boqadi?” — degan edi Prezident. O‘shanda Shavkat Mirziyoyev ko‘pchilik mamlakatdagi tibbiy xizmatlar sifatidan norozi ekanini tanqid qilgandi.
Izoh (0)