Ўзбекистон Суперлигасининг 9-туридан ўрин олган баҳсда Наманганнинг “Навбаҳор” жамоаси ўз майдонида “Хоразм”ни қабул қилди.
Меҳмонлар узоқ йиллик танаффусдан сўнг Суперлигага қайтган бўлса ҳам, жорий мавсумда яхши ўйин намойиш этиб, етакчи жамоаларга муносиб қаршилик кўрсатаётган ва мазкур учрашув ҳам бундан мустасно бўлмаслиги тахмин қилинганди.
Кутилганидек, Ҳаким Фузайлов шогирдлари мезбонларга муносиб қаршилик кўрсатишга интилди ва ўйин кескин курашлар остида кечди. Ўйинчилар ўртасида тўқнашувлар ва даҳанаки баҳслар кўп бўлди. Учрашув тақдирини эса ягона гол ҳал этди.
Мазкур гол учрашувнинг 50-дақиқасида меҳмонлар дарвозасига белгиланган 11 метрли жарима зарбасидан сўнг урилди. Пенальти эса Сергей Лушан шогирдларининг навбатдаги ҳужуми пайтида “Хоразм” дарвозабони Сардор Қобулжанов ўз жарима майдончаси ичида Русланбек Жияновга нисбатан қўполлик ишлатгани учун белгиланди.
Ўн бир метрли жарима зарбасини “Навбаҳор”нинг тажрибали ҳужумчиси Забиҳилло Ўринбоев аниқ амалга оширди ва ушбу гол “лочинлар”га ғалаба келтирди.
“Дарё” “Навбаҳор” ва “Хоразм” жамоалари ўртасидаги ўйиндан фотогалерея тайёрлади.
Фотолар муаллифи: Оқилхон Мамажонов.
Изоҳ (0)