Ўзбекистон суперлигасининг 5-туридан ўрин олган баҳсда Наманганнинг “Навбаҳор” жамоаси ўз майдонида “Шўртан”ни қабул қилди. Ғузорликлар турнир жадвалининг сўнгги поғонасида бораётган бўлишса ҳам мазкур учрашувда мезбонларга муносиб қаршилик кўрсатишга интилди.
Ўйиннинг биринчи бўлими “лочинлар” устунлигида кечди. Биринчи бўлимга ҳакам томонидан қўшиб берилган дақиқалар ўтиб бораётган пайтда бразилиялик ҳимоячи Игор Габриэль тўпни дарвозага аниқ йўллаб, наманганликларнинг танаффусга 1:0 ҳисобидаги устунлик билан чиқиб кетишларини таъминлади.
Учрашувнинг 2-бўлимида Сергей Лушан шогирдлари ҳужумни кучайтирди. Жамоанинг навбатдаги ҳужумларидан бирида Шаҳзод Убайдуллаев зарбасидан сўнг тўп рақиб ҳимоячисининг қўлига тегди ва учрашув ҳаками “Шўртан” дарвозасига 11 метрли жарима зарбаси белгилади. Пенальтини “Навбаҳор” сардори Азим Аҳмедов амалга оширди. Бироқ унинг зарбасидан сўнг “Шўртан” дарвозабони Шоҳруҳ Эшбўтаев тўпни қайтариб, майдон ташқарисига чиқариб юборди.
Учрашувнинг асосий вақтига ҳакам томонидан қўшиб берилган дақиқалар давом этаётган пайтда мезбонлар ҳужумни кучайтирди. Бу 90+7-дақиқада ўз самарасини берди ва Алишер Одиловнинг ўнг қанотдан рақиб жарима майдончаси ичига узатган тўпини Аббос Ғуломов самарали якунлаб, дарвозани аниқ нишонга олди ва якуний ҳисоб 2:0 кўриниш олишини таъминлади.
Қайд этиш жоизки, шу куни икки жамоа ўртасидаги баҳсни кузатиш учун Намангандаги “Марказий” ўйингоҳига рекорд даражадаги — 25 минг нафар мухлис тўпланди.
“Дарё” “Навбаҳор” ва “Шўртан” жамоалари ўртасидаги ўйиндан фотогалерея тайёрлади.
Изоҳ (0)