Ўзбекистон Суперлигасининг 4-туридан ўрин олган баҳсда Наманганнинг “Навбаҳор” жамоаси сафарда “Нефтчи” меҳмони бўлди. Илк дақиқаларидан кескин курашлар остида бошланган баҳснинг 30-дақиқасида Сергей Лушан шогирдлари дарвозадан 30 метрлар чамаси узоқликда жарима зарбаси тепиш ҳуқуқини қўлга киритди. “Навбаҳор” сардори Азим Аҳмедов кучли зарба билан тўпни дарвозага “михлаб” қўйди ҳамда “лочинлар”нинг танаффусга 1:0 ҳисобидаги устунлик билан чиқиб кетишларини таъминлади. Аҳмедов шу тариқа жамоасининг юбилей – 1550-голини урди.
Иккинчи бўлимнинг илк дақиқаларида мухлислар икки голга гувоҳ бўлди. 48-дақиқада Икромжон Алибоевнинг “Навбаҳор” жарима майдончаси ичига оширган тўпини Билолхон Тошмирзаев дарвозага аниқ йўллаб, ҳисобни тенглаштирган бўлса, орадан бир дақиқа ўтар-ўтмас, наманганликлар яна ҳисобда олдинга чиқиб олди.
Бразилиялик ҳужумчи Аугусто Педро тўпни боши билан жамоадоши Русланбек Жияновга етказиб берди. “Нефтчи” дарвозабони Элдорбек Суюнов билан яккама-якка вазиятга чиққан Жиянов тўпни Суюновнинг оёқлари орасидан ўтказиб, дарвозага аниқ йўллади – 1:2.
Ҳисобда ортда бораётган Виталий Левченко шогирдлари мувозанатни тиклаш мақсадида ҳужумни кучайтирди. Майдон эгаларининг 64-дақиқадаги ҳужумидан сўнг ҳисоб тенглашди. “Йўлбарс”ларнинг сербиялик ҳужумчиси Зоран Марушич “Навбаҳор” дарвозабони Шукрон Йўлдошев билан яккама-якка вазиятда қолиб, тўпни дарвозага аниқ йўллади – 2:2.
Учрашувнинг 72-дақиқасида мезбонларнинг навбатдаги ҳужумидан сўнг яна Зоран Марушич жарима майдончаси ташқарисидан кучли ва аниқ зарба йўллаб, якуний ҳисобнинг 3:2 кўриниш олишини таъминлади.
“Дарё” “Нефтчи” ва “Навбаҳор” жамоалари ўртасидаги ўйиндан фотогалерея тайёрлади.
Фотолар муаллифи: Оқилхон Мамажонов
Изоҳ (0)