Ўзингиз ва яқинларингизни табиий маҳсулотлардан тайёрланган уй музқаймоғи билан хушнуд этиш учун қаймоқ, сут, қуюлтирилган сут, шоколад, резаворлар ва мевалар керак, холос. Бу ёзги ширинликни тайёрлаш кўп вақтни ва махсус жиҳозларни талаб қилмайди. Қуйида болалар ва катталар учун мос энг яхши уй музқаймоқлари рецептларини тўпладик.
Сутдан тайёрланадиган мазали музқаймоқ
Бу музқаймоқни исталган мева ёки резавор пюреси билан тайёрлаш мумкин. Агар пюреда шакар бўлса, алоҳида шакар қўшмаслик мумкин. Таркибдаги лимон шарбати тухумнинг ҳидини ва таъмини йўқотади, ванилин эса майин ҳид беради.
Масаллиқлар:
- Сут (3,2% ёғли) – 500 мл
- Тухум сариғи – 2 дона
- Шакар – 3 чой қошиқ
- Ванилин – чимдим
- Крахмал – 1 чой қошиқ
- Лимон шарбати – 1 чой қошиқ (ёки лимон кислотаси – чимдим)
- Қулупнай – 300 г
Тайёрланиши:
- Маҳсулотларни тайёрлаб олинг, резаворларни ювинг.
- Сутни қозонга солинг ва паст оловда қайнаш даражасигача етказинг.
- Алоҳида идишда тухум сариғи, крахмал ва шакарни аралаштиринг.
- Лимон шарбати ва ванилинни қўшинг.
- Тухумли аралашмани аста-секин сутга қўшинг ва аралаштиринг.
- Массани қайнатмасдан, паст оловда бир оз қиздиринг. Сўнг ўртача ҳароратга совитинг.
- Қулупнайни блендерда пюре ҳолатига келтиринг ёки вилкада эзинг.
- Мевали пюрени қўшинг.
- Тайёр массани шаклларга солиб, 6 соатга музлаткичга қўйинг. Агар катта идишда музлатилса, вақти-вақти билан олиб аралаштиринг. Агар кичик порция ларга солинса, бу шарт эмас.
Банандан тайёрланган шакарсиз ва табиий музқаймоқ
Бу рецепт парҳез тутувчилар учун айни муддао. Таркибида фақат мевалар бўлади ва ҳеч қандай қўшимча шакар солинмайди. Банан туфайли музқаймоқ қалин ва чўзилувчан бўлади, киви эса ажойиб нордон таъм беради.
Масаллиқлар:
- Киви – 4 дона
- Банан – 4 дона
- Шоколад (безатиш учун) – таъбга кўра
Тайёрланиши:
- Кивини ювинг ва тозаланг, бананларни ҳам пўстидан ажратинг.
- Меваларни катта бўлакларга бўлинг, идишга тенг қилиб жойланг.
- Меваларни тўлиқ музлаб қолгунча музлаткичга қўйинг.
- Музлаган меваларни блендерга солинг ва бир хил массага келгунча майдаланг.
- Тайёр музқаймоқни стаканларга солинг. Устини майдаланган шоколад, вафли бўлаклари ёки драже билан безанг.
Блендерда тайёрланадиган қуюлтирилган сутли музқаймоқ
Бу оддий, аммо жуда мазали музқаймоқ рецепти. Хоҳишга кўра ванилин шакар қўшиш мумкин. Тайёр асосга резаворлар, мевалар, шоколад бўлаклари, ёнғоқ ҳам қўшса бўлади.
Масаллиқлар:
- Қаймоқ (30% ва юқори) – 300 мл
- Қуюлтирилган сут – 3-4 ош қошиқ
- Ванил шакари– 1 чой қошиқ
Тайёрланиши:
- Совутилган қаймоқни блендерда кўпиртиринг.
- Кўпиртиришни давом эттириб, аста-секин қуюлтирилган сут ва ванил шакарни қўшинг. Жуда ширин бўлиб кетмаслиги учун таъмини текшириб боринг.
- Тайёр массани силикон шаклларга ёки музқаймоқ қолипларига қуйинг. Пластик идишда музлатиб, кейин қошиқ билан олиш ҳам мумкин.
- Музқаймоқни тўлиқ музлаб қолгунча музлаткичда сақланг.
Қаймоқ ва печеньедан оддий уй музқаймоқи
Бу рецепт бўйича печеньели музқаймоқ сендвичи жуда тез ва осон тайёрланади. Музлатиш учун шакл танлаётганда, печеньелар бир-бирига зич жойлашадиган идишни танланг. Бўлакларга бўлгач, яна ярим соатга музлаткичга қўйиш тавсия қилинади.
Масаллиқлар:
- Қаймоқ (33%) – 500 мл
- Қуюлтирилган сут – 1 банка
- Шоколад – 100 г
- Печенье – 300 г
Тайёрланиши:
- Қаймоқ ва қуюлтирилган сутни блендерга солинг ва кўпиртиринг.
- Шоколадни майда бўлакларга майдаланг ва музқаймоқли массага қўшинг, қошиқ билан аралаштиринг.
- Тўғри тўртбурчак шаклдаги идишнинг тагига печеньени териб чиқинг. Устига қаймоқли массани солиб, текисланг ва яна печенье билан ёпинг.
- Музлаткичга камида 4 соатга қўйинг.
- Сўнгра бўлакларга бўлинг ва идишдан олинг.
Изоҳ (0)