O‘zingiz va yaqinlaringizni tabiiy mahsulotlardan tayyorlangan uy muzqaymog‘i bilan xushnud etish uchun qaymoq, sut, quyultirilgan sut, shokolad, rezavorlar va mevalar kerak, xolos. Bu yozgi shirinlikni tayyorlash ko‘p vaqtni va maxsus jihozlarni talab qilmaydi. Quyida bolalar va kattalar uchun mos eng yaxshi uy muzqaymoqlari retseptlarini to‘pladik.
Sutdan tayyorlanadigan mazali muzqaymoq
Bu muzqaymoqni istalgan meva yoki rezavor pyuresi bilan tayyorlash mumkin. Agar pyureda shakar bo‘lsa, alohida shakar qo‘shmaslik mumkin. Tarkibdagi limon sharbati tuxumning hidini va ta’mini yo‘qotadi, vanilin esa mayin hid beradi.
Masalliqlar:
- Sut (3,2% yog‘li) – 500 ml
- Tuxum sarig‘i – 2 dona
- Shakar – 3 choy qoshiq
- Vanilin – chimdim
- Kraxmal – 1 choy qoshiq
- Limon sharbati – 1 choy qoshiq (yoki limon kislotasi – chimdim)
- Qulupnay – 300 g
Tayyorlanishi:
- Mahsulotlarni tayyorlab oling, rezavorlarni yuving.
- Sutni qozonga soling va past olovda qaynash darajasigacha yetkazing.
- Alohida idishda tuxum sarig‘i, kraxmal va shakarni aralashtiring.
- Limon sharbati va vanilinni qo‘shing.
- Tuxumli aralashmani asta-sekin sutga qo‘shing va aralashtiring.
- Massani qaynatmasdan, past olovda biroz qizdiring. So‘ng o‘rtacha haroratga soviting.
- Qulupnayni blenderda pyure holatiga keltiring yoki vilkada ezing.
- Mevali pyureni qo‘shing.
- Tayyor massani shakllarga solib, 6 soatga muzlatkichga qo‘ying. Agar katta idishda muzlatilsa, vaqti-vaqti bilan olib aralashtiring. Agar kichik porsiyalarga solinsa, bu shart emas.
Banandan tayyorlangan shakarsiz va tabiiy muzqaymoq
Bu retsept parhez tutuvchilar uchun ayni muddao. Tarkibida faqat mevalar bo‘ladi va hech qanday qo‘shimcha shakar solinmaydi. Banan tufayli muzqaymoq qalin va cho‘ziluvchan bo‘ladi, kivi esa ajoyib nordon ta’m beradi.
Masalliqlar:
- Kivi – 4 dona
- Banan – 4 dona
- Shokolad (bezatish uchun) – ta’bga ko‘ra
Tayyorlanishi:
- Kivini yuving va tozalang, bananlarni ham po‘stidan ajrating.
- Mevalarni katta bo‘laklarga bo‘ling, idishga teng qilib joylang.
- Mevalarni to‘liq muzlab qolguncha muzlatkichga qo‘ying.
- Muzlagan mevalarni blenderga soling va bir xil massaga kelguncha maydalang.
- Tayyor muzqaymoqni stakanlarga soling. Ustini maydalangan shokolad, vafli bo‘laklari yoki draje bilan bezang.
Blenderda tayyorlanadigan quyultirilgan sutli muzqaymoq
Bu oddiy, ammo juda mazali muzqaymoq retsepti. Xohishga ko‘ra vanilin shakar qo‘shish mumkin. Tayyor asosga rezavorlar, mevalar, shokolad bo‘laklari, yong‘oq ham qo‘shsa bo‘ladi.
Masalliqlar:
- Qaymoq (30% va yuqori) – 300 ml
- Quyultirilgan sut – 3-4 osh qoshiq
- Vanil shakari– 1 choy qoshiq
Tayyorlanishi:
- Sovutilgan qaymoqni blenderda ko‘pirtiring.
- Ko‘pirtirishni davom ettirib, asta-sekin quyultirilgan sut va vanil shakarni qo‘shing. Juda shirin bo‘lib ketmasligi uchun ta’mini tekshirib boring.
- Tayyor massani silikon shakllarga yoki muzqaymoq qoliplariga quying. Plastik idishda muzlatib, keyin qoshiq bilan olish ham mumkin.
- Muzqaymoqni to‘liq muzlab qolguncha muzlatkichda saqlang.
Qaymoq va pechenyedan oddiy uy muzqaymoqi
Bu retsept bo‘yicha pechenyeli muzqaymoq sendvichi juda tez va oson tayyorlanadi. Muzlatish uchun shakl tanlayotganda, pechenyelar bir-biriga zich joylashadigan idishni tanlang. Bo‘laklarga bo‘lgach, yana yarim soatga muzlatkichga qo‘yish tavsiya qilinadi.
Masalliqlar:
- Qaymoq (33%) – 500 ml
- Quyultirilgan sut – 1 banka
- Shokolad – 100 g
- Pechenye – 300 g
Tayyorlanishi:
- Qaymoq va quyultirilgan sutni blenderga soling va ko‘pirtiring.
- Shokoladni mayda bo‘laklarga maydalang va muzqaymoqli massaga qo‘shing, qoshiq bilan aralashtiring.
- To‘g‘ri to‘rtburchak shakldagi idishning tagiga pechenyeni terib chiqing. Ustiga qaymoqli massani solib, tekislang va yana pechenye bilan yoping.
- Muzlatkichga kamida 4 soatga qo‘ying.
- So‘ngra bo‘laklarga bo‘ling va idishdan oling.
Izoh (0)