Har birimiz hayotimizda muvaffaqiyatga erishishni istaymiz, ammo bunga qanday erishish mumkin? Ko‘plab boy va mashhur insonlar muvaffaqiyat sari yo‘lni bosib o‘tishda ma’lum hayotiy tamoyillarga amal qilgan. Ularning kundalik odatlari, vaqtni boshqarish uslubi, intizomi va o‘z ustida ishlashi hayotini o‘zgartirishni istagan har bir kishiga ilhom manbai bo‘lishi mumkin. Quyida dunyoning eng muvaffaqiyatli tadbirkorlari amalda qo‘llaydigan beshta foydali odat bilan tanishasiz.
- Qat’iyat
Muvaffaqiyat sari yo‘l ko‘plab muvaffaqiyatsizliklardan iborat bo‘ladi. Muhimi ular ustida to‘xtab qolmaslik va oldinga intilish. Bu haqiqatni eng muvaffaqiyatli milliarderlar yaxshi bilishadi.
Masalan, Apple asoschisi Stiv Jobs o‘z kompaniyasining direktorlar kengashi tomonidan ishdan bo‘shatilgan edi. Ammo o‘n yil ichida boshqa bizneslarda muvaffaqiyatga erishib, Apple’ga qaytib keldi va kompaniyani yana foydaga chiqardi.
Yana bir misol Uolt Disneyning hayotidir. U mashhur Walt Disney Productions kompaniyasini ochishdan oldin bankrotlikka uchragan: uning birinchi animatsiya studiyasi Laugh-O-Gram muvaffaqiyatsizlikka uchradi.
Shuningdek, britaniyalik yozuvchi, yolg‘iz ona J.K. Rouling ham shon-shuhrat sari oson yo‘l bosmagan. Uning Garri Potter haqidagi kitobini hech bir nashriyot chop etishni istamagan: unga 12 marta rad javobi berilgan. Faqat 13-urinish muvaffaqiyat olib kelgan va keyinchalik unga ulkan gonorarlar keltirgan. Bunga qadar Rouling nafaqaga tayanib kun ko‘rgan.
- Mutolaa
Foyda bermaydigan seriallar o‘rniga, muvaffaqiyatli insonlar ko‘p kitob o‘qishadi. Turli janrdagi kitoblarning ashaddiy ishqibozi, Microsoft asoschisi Bill Geyts ana shunday odam. U ijtimoiy tarmoqlarda tez-tez sevimli kitoblari ro‘yxatini ulashadi. Internetda uning shaxsiy kutubxonasidan 100 dan ortiq asarni topish mumkin.
Mark Sukerberg ham kunni mutolaasiz tasavvur qila olmaydi. Bir safar u o‘z auditoriyasiga har ikki haftada bittadan kitob o‘qishni rejalashtirganini aytgan. U va’dasida turib, eng yoqqan asarlarini obunachilari bilan bo‘lishgan.
- Kundalik rejim
Muvaffaqiyatli insonlar qoidalaridan yana biri qat’iy kundalik rejimga amal qilishdir. Bu intizomni mustahkamlaydi va har doim yaxshi holatda bo‘lishga yordam beradi. Masalan, tadbirkor Ilon Maskning ish kunlari soatlab emas, balki daqiqalab rejalashtirilgan deyishadi. Uning jadvalidan faqat ish emas, balki shaxsiy rejalari ham o‘rin olgan. Maskning aytishicha, faqat shunday qilib hammasiga ulgurish mumkin.
Ko‘plab mashhur milliarderlar esa rejimni yillar davomida o‘zgartirishmaydi. Masalan, Amazon asoschisi Jeff Bezos nima bo‘lishidan qat’i nazar, har kuni 8 soat uxlashga, erta 10 dan oldin uchrashuv belgilamaslikka va albatta oilasi bilan nonushta va kechki ovqat qilishga harakat qiladi.
- Erta tongda turish
Muvaffaqiyatli odamlarning aksariyati tushgacha uxlamaydi va barcha muhim ishlarini ertalab bajarishadi. Tadbirkor Richard Brenson intervyularida har doim erta soat 5 larda uyg‘onishini aytadi. Bu esa unga ish va shaxsiy ishlarga ko‘proq vaqt ajratish imkonini beradi.
The Walt Disney Company rahbariyati raisi Robert Ayger har kuni 5:30 da uyg‘onadi, shunda u bemalol gazeta o‘qish, pochtani ko‘rish va sport bilan shug‘ullanishga ulgura oladi.
Oxygen Channel sobiq rahbari Jerri Leyborn esa har kuni soat 6 da uyg‘onib, ishga ketishdan oldin sayrga chiqadi. Bu esa uni kun bo‘yi energiya bilan ta’minlaydi.
- Sport
Sportning foydasi hammaga ayon: har qanday shifokor doimiy mashg‘ulotlar nafaqat tanani, balki ruhiy holatni ham yaxshilashini aytadi. Muhimi — o‘zingizga yoqadigan jismoniy faoliyat turini topish.
Mark Sukerberg jang san’atini yaxshi ko‘radi. Har kuni ishga borishdan avval bir soat kurash bilan shug‘ullanadi. Yozda yoki dam olish paytlarida esa syorfing bilan shug‘ullanishni yoqtiradi.
Yevropaning eng boy kishisi va Louis Vuitton’ning egasi Bernar Arno haftasiga to‘rt soatni tennisga bag‘ishlaydi. Dunyoning eng muvaffaqiyatli qo‘shiqchilaridan biri Madonna esa ko‘p yillardan beri yoga bilan shug‘ullanadi.
Izoh (0)