Ғазода соғлиқни сақлаш тизими бутунлай инқироз ёқасида. Исроил ҳужумлар нишонини кўчирилган аҳолига бошпана бўлаётган тиббиёт муассасаларига қаратган. Сектордаги очарчилик фонида жароҳатланган ва оғир касалларга қон донорлари етишмовчилиги жиддий муаммо бўлмоқда.
Маълум қилинишича, Исроил томонидан ўрнатилган блокада туфайли секторда жиддий қон танқислиги юзага келмоқда. Бунга сабаб — аҳоли ўртасида кучаяётган очарчилик ва сувсизлик. Бугунги кунгача анклавда Исроилнинг сунъий очлик сиёсати туфайли 193 нафар фаластинлик ҳалок бўлган, уларнинг 5 нафари сўнгги 24 соат ичида ҳаётдан кўз юмган.
Al Jazeera’нинг хабар беришича, секторда ҳозирда фақат 3 та шифохона — Аш-Шифо, Ал-Ақсо ва Носир касалхоналари фаолият юритмоқда. Аммо уларнинг қон захиралари ниҳоятда камайиб кетган. Одамлар яқинларини қутқариш учун қон топширишга уринаётган бўлса-да, уларнинг кўпчилиги сувсизлик ва озиқ-овқат танқислиги туфайли бунга яроқсиз деб топилмоқда. Аш-Шифо шифохонаси қон бўлими раҳбари Амани Абу Уда шундай дейди:
“Донорлик аҳолимиз соғлиғига хавф туғдиради. Сабаби, улар қон топширгандан сўнг бир неча сонияларда ҳушидан кетмоқда. Бу эса бир вақтнинг ўзида қимматли қон бирлигини ҳам йўқотишга сабаб бўлмоқда”.
ЖССТ раҳбари Тедрос Адҳаном Гебреесус Ғазода 14 800 дан ортиқ бемор зудлик билан махсус даво чораларига муҳтожлигини маълум қилиб, халқаро ҳамжамиятни фавқулодда чора кўришга чақирган.
Бу пайтда, Исроил зарбалари ортидан фақатгина 6 августнинг ўзида камида 44 нафар фаластинлик ҳалок бўлган. Ғазо шаҳридаги “Шайх Радвон” маҳалласига тунда авиазарбалар берилиши оқибатида, кўплаб тинч аҳоли жароҳат олгани хабар қилинмоқда. БМТ бошқарувидаги Шайх Радвон соғлиқни сақлаш маркази ҳам ҳужум нишонига айланган. Ушбу ҳужумларга гувоҳлардан бири шундай деди:
“Тунда кечки овқат пайтида бирдан одамлар қичқира бошлади. Ҳеч нарсани ололмадик — на овқат, на кийим, на тўшак. Фақат қочдик”.
Ҳалок бўлганлар орасида БМТ ва АҚШ кўмагидаги Ғазо гуманитар жамғармаси (ҒГЖ) орқали ёрдам олишга уринган 18 нафар одам ҳам бор. Жамғарма май ойи охирида фаолият бошлаганидан бери 1 560 нафардан ортиқ фаластинлик, ёрдам олишга уринган вақтда Исроил томонидан турли баҳоналар билан ўлдирилган. БМТнинг бир гуруҳ вакиллари ҒГЖ фаолиятини танқид қилиб, ташкилотни “гуманитар ёрдамдан ҳарбий ва геосиёсий мақсадлар йўлида фойдаланиш”да айблаган.
Исроил босқинлари Ғазо озиқ-овқат инфратузилмасини деярли бутунлай йўқ қилган. Янги ҳисоб-китобларга кўра, сектордаги экин майдонларининг атиги 8,6 фоизи фойдаланиш учун яроқли, улардан фақатгина 1,5 фоизи зарар кўрмаган.
Шунингдек, Исроил секторга тиббий асбоб-ускуналар ва ёнилғи етказиб берилишини ҳам тўсиб қўйган. Бу эса қатор шифохоналарнинг фаолияти тўхтатилишига олиб келган. БМТ бош котиби Антонио Гутерришнинг вакили Фарҳан Ҳақнинг айтишича, сўнгги 2 кун ичида Керем Шалом чегара пункти орқали 300 минг литр ёнилғи олинган. Аммо бу заруриятнинг жуда кам миқдорини қоплайди холос.
“Бугунги кунда секторда 100 дан ортиқ муддатидан олдин туғилган чақалоқнинг ҳаёти хавф остида”, деди Ҳақ.
У, шунингдек, март ойидан бери 100 дан ортиқ тиббиёт ходимлари, жумладан жарроҳлар ва мутахассислар Ғазо ҳудудига киритилмаганини маълум қилган. Бу орада, ҲАМАС бутун дунё бўйлаб Ғазодаги очарчиликка қарши намойишлар ўтказишга чақирмоқда:
“Шаҳарларда, пойтахтларда, АҚШ ва Исроил элчихоналари олдида намойишлар, юришлар ва протестлар ўтказишга чақирамиз”, дейилади ташкилот чақириғида.
Изоҳ (0)