Қозоғистонда туғилиш кўрсаткиши сўнгги 11 йиллик даражага тушиб кетди. Мамлакатда 2025 йилда 77,3 минг нафар бола туғилди. Бу ҳақда DataHUB экспертлари маълум қилди.
Маълум қилинишича, бу 2024 йилнинг шу даврига нисбатан 16 фоизга кам. 2014 йилнинг биринчи чорагидан бошлаб бу энг паст кўрсаткич ҳисобланади. Туғилишнинг пасайиши мамлакатнинг барча ҳудудларида кузатилган. Оқмўла (-22 фоиз) ва Жетису (-20,1 фоиз) вилоятида кескин пасайиш қайд этилган. Қишлоқлардаги вазият янада ёмонлашган. Туғилиш даражаси 18,1 фоизга камайган, шаҳар жойларда эса бу кўрсаткич 14,2 фоизни ташкил этмоқда.
Умумий туғилиш коэффициенти ҳам пасайган — жорий даража 15,39 бўлиб, бу 2024 йилнинг биринчи чорагига нисбатан 2,94 пунктга кам. Вафот этганлар сони ҳам 7,2 фоизга камайиб, 31 минг кишини ташкил этган.
Натижада аҳолининг табиий ўсиши (туғилганлар ва ўлганлар ўртасидаги фарқ) 20,7 фоизга камайиб, 46,3 минг кишини ташкил этди. Бу ҳам 2014 йилдан бери энг паст кўрсаткич ҳисобланади.
Маълумот ўрнида, 2025 йилнинг январь—февраль ойларида Ўзбекистон бўйича 135 914 та тирик туғилиш ҳолатлари қайд этилган. Қайд этилган туғилишларнинг шаҳар жойлардаги тақсимоти 66 555 тани, қишлоқ жойларда эса 69 359 тани ташкил этган.
Изоҳ (0)