Мамлакатда 2024 йил январь–сентябрь ойларида туғилганлар сони ўтган йил мос давридагидан камайди, вафот этганлар эса кўпайди. Бу ҳақда Статистика агентлиги таҳлилида келтирилган.
Жорий йил 1 октябрь ҳолатига Ўзбекистоннинг доимий аҳолиси 37 миллион 355 минг кишидан ошди. Шундан эркаклар сони 18,8 миллион, аёллар 18,5 миллион нафардан кўпроқ. Мамлакат шаҳарларида 19 миллион, қишлоқларида 18,3 миллион киши яшамоқда.
Январь–сентябрь ойларида республикада 693,9 минг нафар чақалоқ туғилган. Таққослаш учун, 2023 йилнинг мос даврида туғилишлар сони 716,9 мингтани ташкил этган.
2024 йилнинг 9 ойи давомида мамлакатда 131,7 минг одам вафот этган бўлса, ўтган йилнинг шу даврида 129,7 минг инсон ҳаётдан кўз юмган.
Доимий аҳоли сонининг энг кўп улуши Самарқанд вилоятида — 4,3 миллион кишига яқинлашган. Шу билан бирга, Фарғона (4,1 миллион киши) ва Қашқадарё (3,6 миллион киши) вилоятларида қолган ҳудудларга қараганда кўп аҳоли истиқомад қилмоқда.
Энг кам аҳоли яшаётган ҳудуд Сирдарё вилояти бўлиб қолмоқда—926,7 минг нафар. Шунингдек, Навоий вилояти аҳолиси ҳам (1,1 миллион киши) энг кам улушни ташкил этмоқда.
Ўзбекистонда 2024 йил 1 октябрь ҳолатига 1 квадрат километрга ўртача 83,2 киши тўғри келган. Бу ўтган йилнинг мос даврига нисбатан солиштирилганда 1,7 кишига кўп. Ҳудудлар бўйича аҳоли зичлигининг энг юқори кўрсаткичи Тошкент шаҳри (6 909,6 киши), Андижон (801,3 киши), Фарғона (610,0 киши) вилоятларида қайд этилган. Энг паст кўрсаткичлар Навоий вилояти (9,8 киши) ва Қорақалпоғистон Республикасига (12,1 киши) тўғри келган.
Изоҳ (0)