270 миллиард долларлик рағбатлантиришга қарамай, Жанубий Кореяда туғилиш кўрсаткичи рекорд даражага тушиб кетди. Бу ҳақда The Guardian хабар берди.
Жанубий Корея аҳолиси кетма-кет тўртинчи йил қисқармоқда, туғилиш ва никоҳлар сони ҳам камаймоқда. Бир аёлга ўртача фарзанд кўриш сони 0,72 га тушиб, дунёдаги энг паст кўрсаткичга етди. 2023 йилда янги туғилган чақалоқлар сони 230 минг нафарни ташкил этган, бу ўтган йилга нисбатан 19 минг нафарга кам.
Агар туғилишнинг паст кўрсаткичлари давом этса, 2100 йилга келиб аҳоли сони деярли икки баравар камайиб, 26,8 миллионга етади.
2006 йилдан бери ҳукумат эр-хотинларни кўпроқ фарзанд кўришини рағбатлантириш дастурларига 270 миллиард доллардан кўпроқ маблағ сарфлади, нақд субсидиялар, бола парвариши хизматлари ва бепуштликни даволаш учун ёрдам шулар сирасига киради.
Молиявий ва бошқа рағбатлар фарзанд тарбиясида харажат ва мулк нархининг кескин ошиб бораётгани, яхши маошли иш ўринлари йўқлиги ва мамлакатдаги таълим тизими кўп болали оила қуришга тўсиқ бўлаётганидан шикоят қилаётган эр-хотинларни рағбатлантира олмади. Никоҳ фарзанд кўришнинг зарурий шарти сифатида кўрилади, аммо яшаш қимматлиги туфайли никоҳлар сони камайиб бормоқда.
Сўнгги маълумотларга кўра, Жанубий Кореянинг умумий аҳолиси тахминан 51 миллиондан ошади. Шимолий Кореяники эса 25 миллионни ташкил қилади. Бу рақамлар тахминийдир ва туғилиш, ўлим ҳамда миграция каби омиллар туфайли бир оз ўзгариши мумкин.
Изоҳ (0)