EctoLife дунёдаги биринчи чақалоқни сунъий етиштириш қурилмасини тақдим этди. Бу ҳақда Science and Stuff хабар берди.
Маълум қилинишича, EctoLife номли сунъий бачадон концепцияси ҳомиладор бўлишга қийналаётган кўпчиликнинг ҳаётини ўзгартириши мумкин.
«Қурилма саратон ёки бошқа асоратлар туфайли бачадонини жарроҳлик йўли билан олиб ташлаган аёллар учун идеал ечим. Бу, шунингдек, сперма сонининг пастлиги билан боғлиқ муаммоларни ҳал қилишга ҳам ёрдам бериши мумкин», — дейди EctoLife бош директори Ал-Гайли.
Тахминларга кўра, EctoLife ёрдамида бири йилда 30 000 нафаргача чақалоқни «дунёга келтириш» мумкин, бўлажак ота-оналар эса махсус мобил иловадан фойдаланган ҳолда исталган вақтда фарзанди қандай етилаётганини кузатади. EctoLife туғилишнинг пасайиши муаммосига қарши курашиш учун мўлжалланган ва оптимистик экспертларнинг фикрига кўра, келгуси ўн йил ичида ишга тушиши мумкин.
EctoLife сунъий интеллектдан кенг фойдаланиши кутилмоқда, унинг иловасида ҳар бир болани ўз эҳтиёжларига мослаштирилган индивидуал озиқ моддалар билан таъминлаш ҳам ўрин олган. EctoLife, шунингдек, ота-оналарга сунъий қоринда жойлашган ва виртуал эшитиш воситасига уланган 360 даражали камералар ёрдамида фарзандини кузатиш имконини беради.
«Ота-оналар ҳатто мусиқа плейлистни танлаши ёки фарзандлари кўникиши учун ўз овозларини ижро этиши мумкин», — дейди Ал-Гайли.
Таъкидланишича, қурилма туғилиш кўрсаткичи паст бўлган давлатлар, жумладан Япония, Болгария ва Жанубий Кореяга туғилишни оширишда ёрдам бериши мумкин.
Мавзуга доир: АҚШда 30 йил аввал музлатилган эмбриондан соғлом эгизаклар дунёга келди. Бу янги рекорд ҳисобланади (фото)
Изоҳ (0)