Qozog‘istonda tug‘ilish ko‘rsatkishi so‘nggi 11 yillik darajaga tushib ketdi. Mamlakatda 2025-yilda 77,3 ming nafar bola tug‘ildi. Bu haqda DataHUB ekspertlari ma’lum qildi.
Ma’lum qilinishicha, bu 2024-yilning shu davriga nisbatan 16 foizga kam. 2014-yilning birinchi choragidan boshlab bu eng past ko‘rsatkich hisoblanadi. Tug‘ilishning pasayishi mamlakatning barcha hududlarida kuzatilgan. Oqmo‘la (-22 foiz) va Jetisu (-20,1 foiz) viloyatida keskin pasayish qayd etilgan. Qishloqlardagi vaziyat yanada yomonlashgan. Tug‘ilish darajasi 18,1 foizga kamaygan, shahar joylarda esa bu ko‘rsatkich 14,2 foizni tashkil etmoqda.
Umumiy tug‘ilish koeffitsiyenti ham pasaygan — joriy daraja 15,39 bo‘lib, bu 2024-yilning birinchi choragiga nisbatan 2,94 punktga kam. Vafot etganlar soni ham 7,2 foizga kamayib, 31 ming kishini tashkil etgan.
Natijada aholining tabiiy o‘sishi (tug‘ilganlar va o‘lganlar o‘rtasidagi farq) 20,7 foizga kamayib, 46,3 ming kishini tashkil etdi. Bu ham 2014-yildan beri eng past ko‘rsatkich hisoblanadi.
Ma’lumot o‘rnida, 2025 yilning yanvar—fevral oylarida O‘zbekiston bo‘yicha 135 914 ta tirik tug‘ilish holatlari qayd etilgan. Qayd etilgan tug‘ilishlarning shahar joylardagi taqsimoti 66 555 tani, qishloq joylarda esa 69 359 tani tashkil etgan.
Izoh (0)