Буюк Британияда қотилликда айбланиб, 38 йил қамоқда ўтирган эркакка нисбатан чиқарилган ҳукм бекор қилинди. Бу ҳақда ABC News хабар бермоқда.
Таъкидланишича, апелляция суди янги ДНК таҳлиллари натижаларига кўра унинг иши бўйича ҳукмни бекор қилган. Питер Салливан суднинг янги қарорини эшитгач, оғзини қўли билан ёпган ва йиғлаб юборган. Чунки у кўп йиллар давомида ўзини оқлашга уринган.
Англия шимолида жойлашган Уэйкфилд қамоқхонасидан видеоалоқа орқали тингловни кузатган Салливан ўз баёнотида хафа эмаслигини ва яқинлари билан учрашишни интиқлик билан кутаётганини айтган.
“Худо гувоҳ, ҳақиқат сизни озод қилади, дейилган. Афсуски, унда менга етказилган ноҳақликларни бартараф этиш қанча вақт олиши айтилмаган. Мен ғазабланаётганим ҳам, аччиқланаётганим ҳам йўқ”, деган у ўз аризасида.
Адвокат Сара Майетт судда ўз мижози Буюк Британияда ноҳақ ҳукм туфайли энг узоқ вақт қамоқда ўтирган инсон эканлигини таъкидлаган.
68 ёшли Салливан 1987 йилда Англия шимоли-ғарбидаги Ливерпуль яқинидаги Бебингтон шаҳрида Даян Синдаллни ўлдиргани учун судланган.
Маълум қилинишича, турмушга чиқишга тайёрланаётган 21 ёшли гулчи Синдалл 1986 йил август ойида қовоқхонада қўшимча ишдан уйга қайтаётганда, фургонида ёқилғи тугаб қолган. Уни сўнгги марта ярим кечадан кейин йўлда кетаётганини кўришган. Жасади тахминан 12 соатдан кейин тор кўчадан топилган. У жинсий зўравонликка учраган ва шафқатсизларча калтакланган. Жиноят иши бўйича суд Салливанни айбдор деб топган.
Мурдадан топилган уруғни ўша пайтда таҳлил қилиб бўлмаган. 2024 йилда ўтказилган тест унинг Салливанга тегишли эмаслигини кўрсатган.
“Айбловда айтилишича, бу бир кишининг иши бўлган. Бир киши жабрланувчига жинсий зўравонлик қилган. Энди далиллар бу одам айбланувчи эмаслигини кўрсатмоқда”, дейди адвокат Питтер.
Прокурор апелляцияга эътироз билдирмаган ва агар ДНК далиллари тергов пайтида мавжуд бўлганида, Салливаннинг жавобгарликка тортилиши мумкин эмаслигини айтган.
Мерсисайд полицияси терговни қайта бошлаганини ва қотилни топиш учун “барча имкониятлардан фойдаланишга тайёрлигини” маълум қилган.
Изоҳ (0)