Россия Украинага қарши урушда қатнашиш учун хорижий фуқароларни ҳарбий хизматга жалб этишда давом этмоқда. Бу ҳақда Буюк Британия Мудофаа вазирлиги Х ижтимоий тармоғидаги саҳифасида маълум қилди.
Хабарга кўра, хорижликлар 2200 доллар ойлик маош, бир марталик 2000 доллар тўлов, Россия паспорти, бепул тиббий хизмат эвазига мамлакат армиясининг “махсус бўлинмалари” сафига таклиф қилинмоқда.
Лондон бундай реклама профессионал аскарлар учун эмас, балки аввалроқ алданиб, Россия армиясига қўшилган муҳожирларга қаратилганига ишонч билдирган.
Кунига ўртача 913 нафар аскар йўқотишларни ҳисобга олган ҳолда, Россия ўз армияси сонини ошириш учун янги имкониятларни ўрганмоқда, — дея таъкидлаган вазирлик.
Британия разведкаси маълумотларига кўра, 2023 йил ўрталарида Интернетнинг Россия сегментида Марказий Осиё давлатларидан меҳнат муҳожирларини ёллаш бўйича эълонларда ойлик маош таклифи 1973 доллар ва тўловлар 5140 долларни ташкил қилган.
Марказий Осиёнинг барча мамлакатларида, истисносиз, чет давлат армиясида хизмат қилиш жиноят ҳисобланади. Шу боис Россия Мудофаа вазирлиги билан шартнома имзолашга рози бўлган муҳожирлар ватанига қайтган тақдирда, жиноий жавобгарликка тортилади. Ушбу модда бўйича қамоқ жазоси Тожикистонда 5 йилдан 12 йилгача, Ўзбекистонда 5 йилдан 10 йилгача, Қирғизистонда 10 йилдан 12 йилгача бўлган муддатни ташкил этади.
Изоҳ (0)