WikiLeaks асосчиси Жулиан Ассанж Буюк Британиядаги қамоқхонадан гаров эвазига озод қилинди. У ўзига нисбатан 18 та айбловдан бирини тан олиш бўйича тергов билан дастлабки келишувга эришган. Бу ҳақда Deutsche Welle хабар берди.
Ассанж 24 июнь куни эрталаб Британиянинг қаттиқ режимдаги Белмарш қамоқхонасидан чиқди ва Станстед аэропортида самолётга ўтириб, Австралияга учиб кетди. WikiLeaks (аноним манбалардан олинган ёки сиздирилган махфий маълумотларни нашр этадиган халқаро нотижорат ташкилоти) асосчиси 1901 кунни жазони ижро этиш муассасасида ўтказган.
Washington Post ва CNN суд ҳужжатларига таяниб ёзишича, Ассанж тергов билан 18 та айбловдан бири бўйича айбини тан олиш учун дастлабки келишувга эришган. Келишув ҳали расман якунлангани йўқ, дея таъкидлади WikiLeaks. Янги келишув шартларига кўра, АҚШ Адлия вазирлиги прокурорлари австралиялик айбланувчига 62 ойлик қамоқ жазосини талаб қилади.
Жулиан Ассанж иши
АҚШда WikiLeaks асосчиси махфий маълумотларни ўғирлаш, жосуслик ва компьютер тармоқларини бузиш бўйича 18 та моддада айбланмоқда. Агар айби исботланса, у 175 йилга озодликдан маҳрум этилиши мумкин.
Вашингтонга кўра, Ассанж АҚШнинг Ироқ ва Афғонистондаги ҳарбий амалиётларига оид махфий материалларни америкалик аскар Бредли Меннингдан (кейинчалик жинсини ўзгартириб, Челси Меннингга айлантирган) олган. Америкалик расмийлар бу АҚШ разведка хизмати ходимлари ҳаётини хавф остига қўйганини айтмоқда.
Шу билан бирга, Ассанж тарафдорларининг қайд этишича, WikiLeaks сайтида материаллар чоп этилиши натижасида жамоатчилик Америка аскарлари томонидан Яқин Шарқда содир этилган жиноятлар ҳақида маълумотга эга бўлган.
Эквадор элчихонасидан бошпана
2012 йилдан 2019 йилгача Ассанж зўрлаш иши бўйича Швеция томонидан чиқарилган Европа ордери билан ҳибсга олинишидан қўрқиб, Лондондаги Эквадор элчихонасида паноҳ топган. WikiLeaks асосчиси айбини тан олмаган ва Швеция уни АҚШга экстрадиция қилиши мумкинлигини айтган. Кейинчалик Швеция адлия идоралари унга нисбатан дастлабки терговни тўхтатган.
Изоҳ (0)