Хорватия президентининг BMW’сини ўғирлаган «бизнесмен», Қозоғистон ҳудудида илк бор ўтказилган ерости ядровий портлаши ва қор курайдиган машиналарга урилган самолёт. Кун хронологиясида 11 октябрь

11 октябрь санасига боғлиқ диққатга сазовор воқеалар қаторидан Омскда диспетчер хатолиги сабаб қор курайдиган машиналарга урилган самолёт, Хорватия президентининг машинасини олиб қочган «криминал авторитет»нинг бизнесменга айланиши ҳамда Қозоғистон ҳудудидаги биринчи ерости ядровий портлашига оид фактлар ўрин олган.

«Сўнмаган машъала»: Омскда ҳалокатга учраган «Ту-154»

Бундан 38 йил олдин Омск-Марказий аэропортида «Ту-154Б-1» самолёти аэродромнинг учта машинаси билан тўқнашиб кетганди. Ҳаво кемаси бортида бўлган 179 кишидан беш киши омон қолган.

Самолёт Краснодар—Омск—Новосибирск йўналиши бўйича рейсни амалга ошираётган бўлган, уни ҳавода минглаб соат парвоз қилган тажрибали экипаж бошқарган. Самолёт бортида жами 170 нафар йўловчи ва 9 нафар экипаж аъзоси бўлган.

Ҳалокат содир бўлган вақтда шамол эсаётган, осмонни қалин булутлар қоплаган эди, бироқ кўрувчанлик рухсат этилган минимумдан юқори бўлган. Қўнишга тайёрланган экипаж авиадиспетчер Андрей Бородаенкони огоҳлантирган. У эса қўнишга рухсат берган.

100 метр баландликда лайнер булутлар орасидан чиқиб келган ва командир Борис Степанов фараларни ёқишни буюрган. Аммо томчилаётган ёмғир сабаб нур аксланиб, кўрувчанлик ёмонлашган, шу сабабли фаралар ўчирилган. Самолёт қўнишга киришганда командир учиш-қўниш йўлагида нимадир борлигини пайқаб қолган.

Қўниш йўлагида қор тозаловчи учта машина ишлаётган эди. Уларнинг ҳеч қандай милтилловчи маёқлари, эфирни эшитиш учун радиостанциялари ҳам бўлмаган.

Шасси йўлакка тегиши билан экипаж уларни пайқаб қолган, бироқ энди кеч — самолётни буриш имконсиз эди. Иккита машинанинг ҳар бирида 7,5 тоннадан керосин бўлган. Тўқнашув вақтида улар портлаб кетган. Кучли зарба ва портлаш оқибатида лайнер чапга бурилиб, фюзеляжи иккига бўлиниб кетган, олд қисми ағдарилган ва ёнғин чиққан. Самолёт Омск-Марказий аэропорти биносидан 95 метр нарида тўхтаган. Ҳалокатда фақатгина экипажнинг бир қисми омон қолган. Шифохонага куйиш аломатлари билан етказилган 16 йўловчининг 15 нафари вафот этган.

Тергов давомида Бородаенко иш жойида ухлаб қолгани аниқланган — ёш диспетчернинг икки нафар ёш боласи бўлган ва у кўпинча уйқуга тўймай юрган. Бородаенко машиналарнинг йўлакка чиқишига рухсат бериб, «Учиш-қўниш йўлаги банд» таблосини ёқишни унутган. Ҳалокатдан кейин у ҳатто экипаж билан гаплашганини, уларнинг қўнишига рухсатни қандай берганини ҳам эслай олмаган. «Эслай олмайман. Аммо ёзувлар шуни тасдиқласа, демак, шундай бўлган…», — деган у судда.

Бородаенко ва парвозлар бошлиғи Борис Ишалов (у шу куни ишга кеч қолган ва диспетчерларга йўриқномани ёрдамчиси ўтган) 15 йилга озодликдан маҳрум этилган. Айрим маълумотларга кўра, Бородаенко камерада ўз жонига қасд қилган.

Жиноятчи ўтмишига эга футбол ишқибози

1990 йилнинг 11 октябрь куни сербиялик бизнесмен Желко Ражнатович ва Белграддан келган 19 нафар футбол мухлиси Сербия кўнгиллилар гвардиясини тузади. Бир йилдан камроқ вақт ичида улар аввалига Хорватияда, кейин Боснияда жанг қилади.

«Аркан» лақабли Желко Ражнатович 1952 йилнинг 17 апрелида Брезичи (Словения) шаҳрида сербиялик ҳарбий хизматчи оиласида туғилган. Унинг отаси Югославия халқ армиясининг Ҳарбий-ҳаво кучлари полковниги бўлган. Кейинчалик оила Белградга кўчиб ўтган, аммо бу уларга турли муаммоларни туғдирган. Велко Ражнатович Югославия қуролли кучлари таркибидан бўшатилган, ичкиликка берилган ва ғазабини мунтазам ўз оила аъзоларига сочиб келган. «Аркан» болалигидан икки нарсага чидай олмаган: сигарет тутуни ва Белграднинг «Партиза» футбол клубига. Велко ашаддий кашанда ва ушбу жамоанинг мухлиси эди. Желко отасига атай қилгандек, «Партизан»нинг асосий рақиби — «Црвена Звезда» клубига ишқибозлик қилган.

Желко 9 ёшида отаси билан содир бўлган навбатдаги жанжалдан кейин уйидан қочиб кетган. Узоқ вақт у чўнтаккесарлик қилиб, дарбадар юрган. 14 ёшида уни профессионал ўғри деб тан олишган. Уч йил ўтгач Ражнатович заргарлик дўконини ўмаришда иштирок этган. У қўлга тушган ва икки йилга вояга етмаганлар колониясига юборилган. Желко у ерда криминал оламда фойдаси тегадиган танишлар орттирган. Колониядан чиққач, у яна терговга жалб этилган: иш жиддий қамоқ жазосини олиб келарди. 1972 йилда Ражнатович хорижга қочиб кетади.

Турли исмлар остида «Аркан» Италия ва Швеция банкларини ўмарган, Италия мафияларининг вакиллари билан яхши муносабатда бўлган. У швециялик қизга уйланган бўлиб, 1976 йилда ўғилли бўлган. Ражнатовични Интерпол ҳамда Европанинг 12 давлати полицияси қидирган. Бир неча бор ҳибсга олинган бўлса-да, ҳар сафар қочиб кетган. Бельгияда ҳам шундай бўлган, 1974 йилда у 10 йилга озодликдан маҳрум этилган. Кўпчилик Желконинг қочиб кетишига Югославия махсус хизматлари ёрдам берган деб ҳисоблайди.

Миш-мишларга кўра, «Аркан» Югославия ҳукуматига зарар келтираётган шахсларни йўқотиш билан шуғулланган. Масалан, ака-ука Гервали ва Зеки Кадрини — «Қизил фронт» террорчилар ташкилоти. Улар 1982 йилнинг кузида Германияда ўлдирилган, бироқ Ражнатовичнинг бунга алоқасини исботлашнинг имкони бўлмаган. Желконинг ўзи давлат хавфсизлиги органларига алоқаси борлигини доим рад этиб келган.

Шунингдек, «Аркан» «Црвена Звезда» футбол клубининг мухлислари ҳаракати раҳбарига айланган. 1990 йилнинг 13 майида Желко Ражнатович бошчилигидаги сербиялик мухлислар «Динамо Загреб» жамоасига қарши ўтказиладиган Загребдаги «Максимир» стадионига йўл олган. Мухлислар ўртасида тўқнашув юзага келиб, катта тартибсизликка айланиб кетган ва оқибатда 85 киши жароҳат олган. Шундан кейин Ражнатович Хорватиянинг серблар яшайдиган шаҳарларини айланишга тушган. Қайтишда Желко ва унинг тарафдорларини хорват полициячилари тўхтатган. Автомобильдан ўқотар қурол топилган — «Аркан» ҳибсга олиниб, қамоқхонага юборилган.

Қамоқхона камерасида у Югославиянинг парчаланаётганидан ва Хорватиянинг янги ҳукуматидан хабар топган. 200 кунлик қамоқ жазосини ўтаб чиққан Ражнатович кундуз куни Хорватия президенти Франо Тужманга тегишли BMW’ни ўғирлаб қочган.

Дала командири

1990 йилнинг ноябрида Желко Ражнатович ўзининг жанговар бўлинмасини яратишга тушган ва улар билан 1991 йилнинг августида фуқаролик урушига отланган. Бўлинма «Арканнинг йўлбарслари» ёки Сербия кўнгиллилар гвардияси деб аталган. Бўлинма таркибидан «Црвена Звезда» мухлислари, «Аркан»нинг криминал ҳаёти билан боғлиқ танишлари кирган. «Йўлбарслар»нинг биринчи жанги Тен шаҳарчасида бўлиб ўтган. 1991 йил сентябрда «Аркан»нинг бўлинмаси аъзолари 600 жангчига етган. Орадан икки йил ўтгач эса Сербия кўнгиллилар гвардиясига аъзолар 3 минг кишини ташкил этган.

«Аркан»нинг армияси турли шахслар ва Милошвич ҳукумати томонидан молиялаштирилган. Шарқий Словениядан Ражнатович нефть, қурол-яроғ ва озиқ-овқат маҳсулотлари билан савдо қилган. Бўлинма 1995 йилгача — Хорватия ва Босния ҳудудларидаги жанговар ҳаракатлар охирига қадар жанг қилган. 1997 йилда Халқаро трибунал Ражнатовичга нисбатан ҳарбий жиноят айбловида иш очган.

Сиёсатчи ва футбол мураббийи

Уруш вақтида Ражнавотич сиёсий карьера қуришни бошлаган. 1992 йилда у Сербия парламенти делегатига айланган. «Аркан» Косово ва Метохия номидан иш кўрган. У минтақадаги сербларнинг манфаатларини ҳимоя қилишга чақирган ва Албания билан чегарани ёпишни ёқлаган. 1993 йилда «Серб бирдамлиги партияси»га асос солиб, 1996 йилда парламент таркибига киритган.

1995 йилда Ражнатович сербиялик қўшиқчи Светлана Величковичга уйланган. Унинг одатий беқарор ҳаёт тарзи ўзгарган: эндиликда «Аркан» дунёвий матбуотнинг машҳур объекти эди. Унинг тўйи ҳатто Сербия телевидениесида жонли эфирда намойиш этилган.

1996 йилда Желко «Обилич» футбол клубининг эгасига айланган ва у охир-оқибат Чемпионлар Лигасида қатнашган. Югославия ҳукумати унга «Црвена Звезда»ни сотиб олишга рухсат бермаган. Футболга бўлган қизиқиш сабаб Ражнатович Белграддаги Олий мураббийлик мактабида махсус мураббийликка ўқиган.

«Аркан» 2000 йилнинг 15 январида Белграддаги «Континентал» меҳмонхонасида полиця ходими Доброслав Гаврич томонидан отиб ўлдирилган. 23 ёшли полициячи расман шу куни даволанишда бўлган. Соат 17:05 да Гаврич пистолети билан яқинидаги уч кишига ўқ узган. Мандич ва Гарич воқеа жойида ҳалок бўлган, учта ўқ тегган Ражнатович эса комага тушган. Шунингдек, отишмада яна бир гувоҳ аёл ўлдирилган. «Аркан»нинг тансоқчиси Звонко Матеович Гавричга ўқ узган ва бошлиғини шифохонага олиб кетган, бироқ у йўлда вафот этган. 20 январь куни Белграддаги қабристонда дафн маросими ўтказилган ва унга 10 минг одам ташриф буюрган.

Қотил полициячи 2002 йилда 19 йил муддатга озодликдан маҳрум этилган. 2006 йилда унинг ишини қайта кўриб чиққан суд Гавричга тайинланган ҳукмни ўзгартириб, унга 30 йилга озодликдан маҳрум этиш жазосини тайинлаган. Аммо қотилликни ким буюртма қилганини аниқлашнинг имкони бўлмаган.

Қозоғистон ҳудудида синовдан ўтказилган биринчи ерости ядровий портлаш

Қозоғистоннинг Семипалатинск шаҳридаги собиқ синов полигонида 1961 йилнинг 11 октябрь куни СССРда биринчи марта ерости ядровий портлаши амалга оширилган. 1947 йилнинг 21 августида СССР Вазирлар Кенгаши 2-давлат тадқиқот ядро полигонини ташкил этиш тўғрисида махфий қарорни қабул қилганди.

Ҳозирда Қозоғистонга қаровчи Семипалатинск полигони 1948 йилда совет давлатидаги биринчи ядровий қуролни синовдан ўтказиш мақсадида яратилган. Полигон Қозоғистон шимоли-шарқида, Павлодар, Қарағанда ва собиқ Семипалатинск вилоятлари туташган жойдан ўрин олган.

Полигондаги биринчи ядровий портлаш 1949 йилнинг 29 августида, охиргиси — 1989 йилнинг 19 октябрида амалга оширилган. 40 йил давомида полигонда жами 456 та ҳаво, ерусти ва ерости ядровий портлашлари амалга оширилган. Ядровий қуроллар 1963 йилгача ер устида ва ҳавода синовдан ўтказилган. 1963 йилда АҚШ ва Буюк Британия билан атмосферада, космик маконда ва сув остида ядровий синовларни тақиқлаш тўғрисидаги битим имзолангач, СССР ерости портлашларини ўтказишни бошлаган. Ядровий портлашдан ташқари, полигон ҳудудида кимёвий портловчи воситалардан фойдаланилган ҳолда 175 та портлаш амалга оширилган.

1991 йилнинг 29 августида Семипалатинск полигони Қозоғистон президенти Нурсултон Назарбоевнинг қарори билан ёпилган, қолган ядровий зарядлар эса йўқ қилинган. Охирги ядровий заряд полигонда 1995 йилнинг 31 май куни кимёвий портлаш усули орқали портлатилган.

Қозоғистон Фанлар академияси тадқиқотчилари томонидан 1957-1959 йилларда амалга оширилган ўрганишлар давомида ядровий синовларнинг экологияга хавфи, Семипалатинск полигонига туташ ҳудудларда радиоактив ифлосланишнинг ортиб кетгани ва одамлар ҳамда ҳайвонларда касалликлар юзага келаётгани аниқланган. Ер усти ва ҳаводаги портлашлар натижасида радиоактив булутлар, ер остидаги портлашлардан эса газлар тўпланмаси полигон ҳудудидан ташқарига ҳам тарқалган.

1996 йилнинг апрелида Қозоғистон Миллий ядровий маркази ҳамда АҚШ Мудофаа вазирлиги ҳузуридаги Ядровий хавфсизлик агентлиги ўзаро битим имзолаб, унга кўра, қозоқ ва америкалик мутахассислар синовлар ўтказилган 186 та туннелни йўқ қилган.

2000 йил 29 июль куни Семипалатинск ядровий полигонидаги охирги туннел портлатилган. Полигон фаолияти тўхтатилган. Ядровий синовлар қурбонлари хотирасига Семипалатинскка монумент ўрнатилган.

«Кун хронологияси» лойиҳаси доирасида ҳар куни эрталаб соат 09:30 да ушбу санага боғлиқ энг муҳим ва қизиқарли воқеалар ёритиб борилади.