Буюк Британия бош вазири Кир Стармернинг хусусий уйида 12 майга ўтар кечаси ёнғин содир бўлди. Бинога ўт қўйишда гумон қилинаётган 21 ёшли шахс қўлга олинди. Бу ҳақда Sky News хабар берди.
Маълум бўлишича, уй Лондоннинг Кентиш-Таун районида жойлашган ва ёнғинда унинг эшигига зарар етган. Стармер ва унинг оиласи 2024 йил июлидан бери Даунинг-стритдаги бош вазирнинг расмий қароргоҳида яшамоқда.
Аксилтеррор полицияси ёнғин тафсилотларини ўрганишга киришган, чунки гап юқори мартабали жамоат арбоби билан боғлиқ бўлган бино ҳақида кетмоқда, дейилади хабарда.
Полиция, шунингдек, 11 май куни Ислингтондаги уйда содир бўлган ёнғинни текширмоқда, унда ҳам кириш эшиги ёниб кетган. Бу уй ҳам Стармер билан боғлиқ бўлиши мумкин.
Суриштирув давомида, 8 май куни Кентиш-Таун ҳудудида автомобилнинг ёниб кетиши ҳам текширилмоқда. Полиция учта ёнғин ўртасида боғлиқлик борлигини тахмин қилмоқда. 13 май куни Британия полицияси бу ёнғинларга алоқадорликда гумон қилинаётган 21 ёшли эркакни қўлга олган. Ҳозирча бошқа тафсилотлар келтирилмаган.
Британия бош вазири авария-қутқарув хизматларига миннатдорлик билдирди. Бош вазирнинг расмий вакили тафсилотларни келтиришдан бош тортди, жумладан, ёнғин бошланган пайтда биноларда кимлар бўлиши мумкинлигига аниқлик киритмади. Ички ишлар вазири Иветт Купер ҳам тергов жараёнига изоҳ бермади.
Изоҳ (0)