Президент ҳузуридаги Давлат бошқаруви академияси Президент ҳузуридаги Давлат сиёсати ва бошқаруви академияси этиб қайта ташкил этилади. Бу ҳақда “Истиқболли кадрларни мақсадли тайёрлаш ҳамда уларни давлат бошқаруви ва хизматига самарали жалб этиш тизимини янада такомиллаштириш чора-тадбирлари тўғрисида”ги президент фармонида белгиланди.
Академиянинг асосий вазифаларидан бири этиб давлат хизматчиларининг малакасини мунтазам ошириб бориш ва қайта тайёрлаш, шунингдек, бошқарув кадрларини магистратура ва олий таълимдан кейинги таълим босқичларида ўқитиш белгиланди.
Фармонга кўра, Президент ҳузуридаги Давлат сиёсати ва бошқаруви академиясининг Васийлик кенгаши тузилади.
2025 йил 1 июлдан давлат органлари ва ташкилотлари томонидан давлат хизматчиларининг малакасини ошириш ва қайта тайёрлаш ходимларнинг касбий ривожланиш эҳтиёжларига асосланган ҳолда ташкил этилади ҳамда малака оширишнинг анъанавий, муқобил ва мустақил шакллари жорий этилади.
Фармонга кўра, 2025 йил 1 октябрдан академияда давлат хизматидаги раҳбарлар, раҳбарликка номзодлар ва бошқарув кадрлари малакасини ошириш бўйича қисқа муддатли курслар жорий этилади. Қисқа муддатли курслар якунлари бўйича давлат хизматчиларининг олган билим ва кўникмалари диагностикадан ўтказилади.
2026 йил 1 январдан бошлаб Давлат сиёсати ва бошқаруви академиясида муддати 6 ойгача бўлган қуйидаги қайта тайёрлаш таълим дастурлари жорий этилади:
- геосиёсат, глобал хавфсизлик, барқарор ривожланиш, лойиҳа бошқаруви каби йўналишларда Президент Администрацияси топшириғига мувофиқ ташкил этиладиган махсус курслар;
- “Раҳбар аёллар” дастури (ташаббускор аёлларнинг раҳбарлик кўникмаларини ривожлантириш мақсадида);
- “Келажак лидерлари” дастури (истиқболли ёшларни давлат хизматига жалб этиш мақсадида);
- “Тизимли таҳлил, стратегик режалаштириш ва мақсадли кўрсаткичларга эришиш” дастури;
- “Ҳудудларни ижтимоий-иқтисодий ривожлантириш ва хорижий инвестисияларни жалб этиш” дастури;
- “Кадрлар захирасини шакллантириш ва инсон ресурсларини ривожлантириш” дастури;
- “Давлат дастурлари ва лойиҳаларини самарали бошқариш” дастури.
Қайта тайёрлаш таълим дастурларига номзодлар рўйхатини Давлат хизматини ривожлантириш агентлиги шакллантиради ҳамда ҳар йили 1 июлга қадар академияга тақдим этиб боради.
2025/2026-ўқув йилидан “Ҳудудларни комплекс ривожлантириш”, “Давлат бошқаруви”, “Инсон ресурсларини ривожлантириш” магистратура мутахассисликлари бўйича кадрлар тайёрланади.
2026/2027-ўқув йилидан:
- “Давлат сиёсати” (Public Policy) ва “Давлат молиясини бошқариш” (Public Finance Management) магистратура мутахассисликлари бўйича кадрлар тайёрланади;
- юқори малакали ва замонавий билимларга эга бошқарув кадрлари захирасини шакллантириб бориш мақсадида амалиётчи бошқарувчилар учун махсус дастурлар (Executive МPА ва Executive MBA) жорий этилади;
- магистратура дастурлари хориждаги нуфузли олий таълим ташкилотлари билан ҳамкорликда қўшма таълим дастурлари ва модуллар бўйича ташкил этилади.
Давлат бошқаруви академиясини Президент ҳузуридаги Давлат сиёсати ва бошқаруви академияси этиб қайта ташкил этиш кўзда тутилаётгани 5 май куни Шавкат Мирзиёев истиқболли кадрларни мақсадли тайёрлаш ва мутахассисларнинг хорижда таълим олишини қўллаб-қувватлашга оид таклифлар тақдимоти билан танишганида маълум қилинганди. Академияда таълим дастурлари ва илмий тадқиқотлар сифатини ошириш бўйича тавсиялар бериш, нуфузли хорижий илмий-таълим муассасалари билан ҳамкорлик ўрнатиш учун Халқаро академик маслаҳат кенгаши тузилади.
Президент ҳузуридаги Давлат бошқаруви академияси ҳақида
Академия давлат томонидан молиялаштирилувчи ва ўзига хос олий таълим муассаса бўлиб, у Тошкент шаҳрида жойлашган. 1995 йил май ойида Давлат ва жамият қурилиши академияси сифатида ташкил топган мазкур таълим муассассаси президент томонидан ташкил этилган ягона билим юрти бўлиб, унда ҳам марказий, ҳам маҳаллий хукумат идоралари ходимлари учун илмий даража берувчи ҳамда илмий даража бермайдиган турли дастур ва курслар тақдим этилади. 2012 йилда мазкур билим юрти Президент ҳузуридаги Давлат бошқаруви академияси сифатида қайта тузилган.
Миллий ва ҳудудий хокимият бошқарув тизимидаги ходимларни онлайн ва бевосита самарали тайёрлаш ва қайта тайёрлаш, ҳамда маъмурий бошқарув тизимини ривожлантириш, фаолиятини ташкиллаштириш ва такомиллаштиришни ўрганиш орқали давлат бошқарувини ривожлантириш ушбу олий ўқув юртининг асосий мақсадидир.
Изоҳ (0)